Milena Pires. Imajen Tatoli//JOgerjo Guterres

DILI, 16 marsu 2022 (TATOLI)–Kandidatu Prezidente Repúblika (PR), Milena Pires kompromete katak bainhira eleitu sai PR ba périodu 2022-2027 hakarak hakbesik prezidénsia ba povu hotu. Katak, Prezidente Repúblika labele taka nian aan maibé presiza mós moris iha povu nia leet.

“Se Prezidente Repúblika hala’o serbisu iha Bairru Pite (Palásiu Prezidente) fulan ida, semana rua, entaun semana rua presiza hakbesik ba povu,” Kandidata PR ho númeru sorteiu hitu (7) ne’e ba ekipa kobertura Tatoli iha Fundasaun Ahisaun, Ai-mutin, Comoro, Dili, iha tersa ne’e.

Tuir nia, hakarak hakbesik ba povu atu bele komprende didi’ak povu nia moris loroloron, hakarak hatene oinsá impaktu programa Governu ba povu.

“Hanesan ne’e, atu halo kontaktu konstante ho Governu atu nune’e bele bolu fila fali Governu nia foku, programa no polítika sira ba hatan saida mak povu presiza,” nia dehan.

Kandidatu PR, Milena Pires akresenta tan katak aspetu ida husi PR mak fó motivasaun ba populasaun.

“Ita haree katak dalabarak natar, to’os sira, iha munisípiu sira abandona tanba ema hotu halai mai Dili buka Serbisu. Ita presiza prezidente repúblika iha kapasidade atu enkoraja, bolu fila fali ita-nia ema sira atu serbisu iha parte agrikultura,” nia hateten.

Nia dehan, “Ita presiza prezidente repúblika ida ne’ebé bele konvense Governu através polítika públika sira atu halakon, purezemplu, subsídiu ne’ebé Governu halo ba importasaun foos, investe fila fali ba agrikultura, atu bele iha soberania ba hahán”.

Ifa-ne’e hanesan programa esensiál ida husi programa haat seluk ne’ebé mak Kandidatu ba PR, Milena Pires kompromete bainhira eleitu. Deskrisaun programa kandidatu ho sortei númeru hitu (7) mak hanesan tuirmai:

  1. Hakbesik prezidénsia ba povu;
  2. Investimentu ba forsa defeza atu bele partisipa mós iha forsa manutensaun ba páz;
  3. Influénsia ezekutivu foti desizaun ba polítika públika: empregu, edukasaun, sa’ude, etc;
  4. Ativa iha serbisu relasaun internasionál;
  5. Promove dialogu inkluzivu entre instituisaun Estadu hasa’e prestasaun servisu, ho sosiedade, inter-jerasaun, ema hotu, etc;

Programa lima ne’e, Kandidatu Milena Pires aprezenta no kompromete atu bele implementa bainhira eleitu sai Xefe Estadu, tanba ho vizaun katak: “Kontribui ba sosiedade ne’ebé inkluzivu, ekitativu, solidáriu no justu, ne’ebé sidadaun hotu bele moris ho dignidade, livre husi violénsia no violasaun iha Estadu Diretu demokrátiku”.

Mensajen

Mensajen ba públiku atu bele ezerse direitu votu, tuir prinsípiu demokrasia, Kandidatu PR, Milena Pires ho Sorteiu nú. 7 ne’e iha mensajen tolu.

“1) Ba inan-feton sira, alin feto sira, tempu to’o ona atu feto hili feto tanba ita hakarak tinan ida ne’e ita hakarak feto tuur iha Ai-tarak laran (Palásiu Prezidente) atu defende didi’ak feto nia direitu mas ita lakohi kualker feto. Ita hakarak feto ne’ebé tuur tiha ona, defende duni feto nia direitu. Nia prova tiha ona katak nia konsege duni defende direitu feto ho di’ak”.

“2) ba joven sira, ba estudante sira, se ita rasik mak hakarak determina ita-nia futuru, entaun partisipa iha eleisaun, vota ba ema ne’ebé iha direitu defende didi’ak ita-nia direitu. Se la partisipa iha eleisaun, ema seluk mak sei determina ita-nia futuru. 3) ba populasaun tomak, se ita hakarak mudansa ba Timor-Leste, se ita hakarak prezidente repúblika ida ne’ebé konsiente ba dezigualidade sosiál, injustisa sosiál vota nú.7”.

Biografia

Kandidatu PR, Milena Pires moris iha Dili, husi aman Manuel H.J Pires, ema Viqueque no hosi inan Leocadia T. Lopes Pires, ema Covalima.

Milena iha maun na’in rua: Amavel no Evaristo Pires. Milena kaben ho Zacarias no inan ba oan mane ida naran Hali.

Milena Pires hetan nia lisensiatura iha área sosiolojia, Literatura lian inglés no polítika husi University of New England, Armidale, NSW, Austrália.

Milena Pires eleje nu’udar Membru Asembleia Konstituiente no Membru Lejislatura dahuluk Parlamentu Nasionál iha tinan 2001-2002.

Milena Pires uluk hala’o knaar nu’udar Diretora kampaña ba Kay Rala Xanana Gusmão durante eleisaun prezidensiál iha 2001.

Iha tinan 2010, Milena Pires eleje nu’udar komité CEDAW fKonvensaun atu halakon forma diskriminasaun oioin hasoru feto).

Milena Pires nu’udar ativista no defensora direitu umanu, feto, komunidade LGBTI, feto iha área rurál no feto nia partisipasaun iha polítika, no ativista kontra violénsia hasoru feto no labarik sira.

Milena Pires ikusliu hala’o knaar nu’udar embaixadora reprezentante permanente Timor-Leste nian iha Nasaun Unida iha Nova Iorke 2016-2020.

Jornalista : Rafy Belo

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here