Tribunál Distritál Baucau liuhosi julgamentu interrogatóriu dahuluk aplika medida koasaun aprezentasaun periódika ba arguidu na’in-tolu tanba deskonfia envolve krime omisídiu iha Darsula. Imajen Tatoli/Natalino Belo.

BAUCAU, 13 marsu 2022 (TATOLI) – Tribunál Distritál Baucau (TDB) adia prosesu interrogatóriu dahuluk ba kazu Darsula ne’ebé hamate vítima João Ornai Ximenes tanba sei presiza pedidu hosi Ministériu Públiku.

Prosesu interrogatóriu dahuluk ba arguidu na’in-tolu ho insiál DC, JFX no CJF tanba deskonfia oho vítima João Ornai Ximenes iha Darsula, suku Gariuai, postu administrativu Baucau Vila.

Defensór Públiku ne’ebé fó asisténsia legál ba arguidu sira, José de Lima esplika, tribunál labele realiza interrogatóriu dahuluk tanba razaun bainhira PNTL kaptura arguidu na’in-tolu fora fragante delitu entaun presiza Ministériu Públiku submete pedidu ba Tribunál.

 Bainhira Ministériu Públiku submete ona pedidu ba tribunál hafoin kaptura arguidu na’in-tolu no submete ba interrogatóriu dahluuk iha trinunál.

“Sira iha PNTL kumpri de’it oras 12 hodi indentifika, hasai identidade tanba razaun Ministériu Públiku sei halo pedidu ba Tribunál hodi hasai despaxu foun atu kaptura fali sira nune’e submete ba primeiru interrogatóriu,” Defensór Públiku Jose de Lima hateten iha TDB, Vila Nova, tersa ne’e.

Maske nune’e, tanba razaun prevene seguransa relasiona ho vítima ho arguidu sira mesak família no viziñu entaun parte defeza autoriza arguidu na’in-tolu iha kurridór PNTL nia área hodi hein mandadu tribunál.

Arguidu na’in-tolu rasik tersa ne’e, hamutuk Advogadu José de Lima ne’ebé fó asisténsia legál marka  prezensa iha Tribunál maibe prosesu julgamentu interrogatóriu dahuluk adia tanba Ministériu Públiku seidauk hasai mandadu.

Arguidu sira deskonfia oho João Ornai Ximenes iha loron sábadu (12/03) purvolta oras 14:00, bainhira mosu asalta derrepente hosi membru grupu arte-marsiál utiliza atributu partidu ne’ebé deskonfia organizadu antes hahú kampaña kandidatura Prezidente Repúblika númeru sorteiu 6, Francisco Guterres ‘Lú Olo’ iha aldeia Darsula, suku Gariuai postu administrativu Baucau vila.

Vitíma João Ornai Ximenes idade 21 hakotu iss iha fatin akontesimentu tanba hetan pankada no parte PNTL liuhosi SIK transporta kedas mate-isin ba Hospital Nacional Guido Valadares (HNGV) Dili hodi submete ba prosesu autópsia.

Vítima no suspeitu sira iha ligasaun família maibé diferente arte-marsiál tanba problema anteriór nune’e aproveita kampaña hodi hamosu konfrontu hodi rezulta vítima hakotu iis.

Prosesu julgamentu ne’e sei prezide hosi Juiza Singular Sribuana da Costa, Ministériu Públiku reprezenta hosi Prokuradór Bartolomeu de Araújo, no suspeitu na’in-tolu hetan asisténsia legál hosi Defensór Públiku, José de Lima.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here