Diretór STAE Covalima, Francisco Gusmão. Imajen TATOLI/Celestina Teles

COVALIMA, 15 marsu 2022 (TATOLI)—Sekretáriadu Tékniku Administrasaun Eleitorál (STAE) Covalima hamutuk ho ofisiál Komisaun Nasionál Eleisaun (CNE, sigla portugés) halo verifikasaun ba bulletin votu edentifika tahan 138 mak sei la uza tanba nakles no balun númeru seriál laiha.

“Durante ami halo vrifikasaun ba buletin votu, ami identifika fola 138 mak ita labele uza, tanba bulrtin votu balun nakles, foer no balun laiha númeru seriál entaun buletin hirak ne’e ita labele uza,” Diretór STAE Covalima, Francisco Gusmão, informa ba Agência Tatoli, iha nia knar fatin, Kampung Baru, tersa ne’e.

STAE simu materiál sensitivu ho non sensitivu iha loron 11 fulan marsu ne’e, ho totál livru buletin votu hamutuk 1070 no urna 240. 

Bazea ba verfikasaun durante loron haat ne’e, brigada STAE no ofisiál CNE halo verifikasaun identifika livru ida ho tahan 138 mak labele uza tanba balun aat, fo’er, nakles no laiha númeru seriál entaun STAE asegura iha munisípiu hodi labele haruka ba iha sentru votasaun sira.

STAE identifika bulletin votu nia tahan ne’ebé mak labele uza hosi sentru votasaun sira mak hanesan sentru votasaun EBC Beco, Eskola Café, EBF Ave Maria, EBF Alastehen iha postu administrativu Fatumea, EBF Orbiti iha postu administrativu Maucatar no EBF Ogues. 

Daudaun ne’e STAE finaliza ona halo verifikasaun materiál sensitivu, falta materiál non sentitivu maibé atu halo pakotementu hodi distribui ba iha sentru votasaun sira, sentru votasaun Usecai seidauk iha lista votante no menus númeru seriál atu xave urna.

Dadus hosi STAE haktuir, eleitór ne’ebé atu ezerse sira-nia direitu iha loron 19 fulan marsu ne’e hamutuk 47,807 ne’ebé kompostu hosi mane 2,4446 no feto 2,3361.

Sentru votasaun iha munisípiu Covalima hamutuk 80 no estasaun votasaun 92.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here