Pergunta debate públiku ba kandidatu PR sei fahe ba sesaun tolu
DILI, 15 marsu 2022 (TATOLI)—Vise Prezidente Komisaun Nasionál Eleisaun (CNE-sigla portugés), Domingos Barreto, hateten pergunta ba debate públikune’ebé sei husu ba kandidatu Prezidente Repúblika (PR) períodu 2022-2027 hamutuk na’in-16 ne’e sei fahe ba sesaun tolu.
Debate publiku ne’ebé CNE realiza ne’e, sei hala’o iha Hotel Novo Torismo ne’ebé GMNTV sei halo trasmisaun direta iha tuku 20h00-24h30 kalan, ne’ebé sei modera hosi moderadór Expedito Dias Ximenes.
“Iha debate ne’e ita fahe ba sesaun tolu (3). Sesaun dahuluk husu pergunta ba kandidatu hotu-hotu hanesan ho lian tétun. Sesaun daruak kandidatu sei dada rifa maibé pergunta ne’ebé lahanesan no sesaun datoluk mak pergunta hanesan ba kandidatu hotu-hotu ho lian portugés depois ikus liu mak lia-tatoli ka mensajen hosi kandidatu sira,” Domingos Barreto hateten ba Agência TATOLI, via telefónika, tersa ne’e.
Vise Prezidente ne’e hatutan, pergunta ba kandidatu PR períodu 2022-2027 ne’e elabora hosi sosiedade sívil no akademista sira hamutuk pergunta 100-resin, hafoin ne’e ekipa CNE halo selesaun to’o hela de’it pergunta 16, maibé pergunta hirak ne’e ba sesaun dada rifa nian.
Tuir nia, kandidatu Prezidente Repúblika hotu-hotu sei partisipa iha debate públiku ne’e tanba kandidatu hirak ne’e mai atu hato’o sira-nia programa no kompromisu polítiku ba eleitor sira iha rai-laran nomós iha rai-li’ur.
“Ami prepara hotu ona fatin no ami fiar katak sira sei marka prezensa hotu iha debate ne’e, tanba ami seidauk simu informasaun kona-ba kandidatu balun la partisipa. Kandidatu PR sira tenke mai no sei laiha reprezentante ida hosi kandidatu tanba bainhira sira manán, sira na’in rasik mak sei lidera no sai Prezidente Repúblika,” nia informa.
Entretantu antes ne’e, Prezidente CNE, José Agostinho da Costa Belo, hateten, pergunta ba kandidatu PR ne’e la’ós moderadór Expedito Dias Ximenes mak elabora ka iha debate ne’e moderadór sei la dezenvolve no bazea de’it ba pergunta ne’ebé sosiedade sivil no akademista sira elabora no prepara ona.
Ajenda Debate Públiku
Ajenda ba debate públiku entre Kandidatu Prezidente Repúblika períodu 2022-2027, iha tersa (15 marsu 2022), iha Hotel Novo Torismo, Dili.
Primeira Parte
Iha tuku 16h30-17h30, komisaun organizadora rejistu bapartisipante sira
Iha tuku17h30-18h30, komisaun organizadora oferta jantar ba konvidadu sira
Iha tuku 18h30-19h30, entrevista ho kandidatu Prezidente Reúblika 2022-2027
Iha tuku 18h30-20h00, kandidatu Prezidente Repúblika sa’e ba palku leten
Iha tuku 20h00-24h00, debate públiku ne’ebé modera hosi moderadór
Sekuénsia ba programa debate
Iha tuku 20h00-20h20, komisaun organizadora sei lee sai regulamentu debate; CMNTV sei fó sai perfil hosi kandidatu Prezidente Repúblika sira; Orasaun ne’ebé sei lidera hosi Pe. Angélo Salsinha; Hino Nacional; liafuan Bem-Vindu no abertura ofisiál ba debate hosi Prezidente CNE, José Agostinho da Costa Belo.
Iha tuku 20h00-24h00, debate entre kandidatu Prezidente Repúblika ne’ebé modera hosi Expedito Dias Ximenes.
Terseira Parte
Iha tuku 24h00-24h30, enseramentu hosi komisaun organizadora.
Jornalista : Osória Marques
Editór : Cancio Ximenes
