Reprezentante Kandidatu PR asiste loke pakote materiál Eleisaun Prezidensiál, iha salaun munisipál, segunda (14/03). Imajen TATOLI/Vitorino Lopes da Costa

VIQUEQUE, 14 marsu 2022 (TATOLI)–Komisaun Nasionál Eleisaun (CNE, sigla portugés) no Sekretariadu Tékniku Administrasaun Eleitorál (STAE), iha segunda ne’e, loke materiál ba Eleisaun Prezidensiál perante reprezentante Kandidatu Prezidenti Repúblika (PR).

“Ohin ami hahú loke pakote materiál sensitivu no naun sensitivu, liuliu buletin votu nian, loke ba fiskál hosi Kandidatu Prezidente Repúblika ba períodu 2022-2027,” Diretór STAE munisípiu Viqueque, Humberto da Costa, hateten ba Agência TATOLI, iha salaun munisipál, segunda ne’e.

Notísia relevante: STAE Viqueque simu materiál sensitivu kaixa 23 ba Eleisaun Prezidensiál

Objetivu loke buletin atu iha transparánsia, ne’ebé pakote loke buletin ne’e durante loron-tolu, hahú ohin to’o loron 17 hodi reprezentante sira bele haree direta, nune’e iha loron 18 marsu mak halo distribuisaun ba sentru votasaun sira iha munisípiu Viqueque.

Nia dehan, STAE konvida hotu reprezentante hosi Kandidatu PR na’in-16, maibé reprezentante balun la partisipa.

“Maski reprezentante balun mai no balun la mai, ida-ne’e tuir lei la prejudika ba atividade ne’e. Tanba ne’e, ohin ita hala’o durante loron-haat,” nia tenik.

Nune’e, reprezentante Kandidatu PR ne’ebé partisipa asiste responsável sira loke pakote livru buletin eleisaun.

Iha biban ne’e, proibidu reprezentante sira hasai foto buletin no publika iha rede sosiál, liuliu Facebook.

Seremónia ne’e hetan partisipasaun hosi Diretór CNE, Ofisiál Supervizaun CNE, Brigadista STAE, Reprezentante Kandidatu PR na’in-16 no akompaña hosi Polísia Nasionál Timor-Leste (PNTL).

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here