Diretór Jerál STAE, Acilino Manuel Branco. Imajen TATOLI/António Dasiparu.

DILI, 11 marsu 2022 (TATOLI)—Diretór Jerál Sekretariadu Tékniku Administraun Eleitorál (STAE), Acilino Manuel Branco, hateten, Ministériu Saúde lakonsege aprezenta lista pasiente ne’ebé baixa hela iha ospitál sira ba STAE, tanba atu submete naran sira-ne’e hela de’it ona loron ualu (8).

“Ba ita-nia maluk sira-ne’ebé moras no internadu iha ospitál nasionál, rejionál no referral, ita halo kontaktu iha fulan kotuk ba parte responsável Ministériu Saúde nian iha ospitál tuir lei katak loron 10 antes ba eleisaun sira tenke komunika ba STAE hodi lori lista internadu, médiku, enfermeira, no funsionáriu saúde nian ne’ebé mak ezerse funsaun iha loron eleisaun iha ospitál refere maibé pasiente Ospitál Nasionál Guida Valadares (HNGV-sigla portugés) nia lista naran ne’e seidauk entrega,” Acilino Branco hateten ba jornalista sira hafoin distribui materiál eleisaun ba munisípiu sira inklui diáspora ba diplomata sira, iha STAE Caicoli, Dili, sesta ne’e.

Maibé, nia dehan, dadus ne’ebé mak STAE simu iha loron ikus iha 07 marsu katak médiku no enfermeira sira hosi munisípiu sira la aprezenta lista interandu ba STAE atu tuir votasaun movel.

Moras ne’ebé mak ba konsulta iha ospitál iha munisípiu sira dalaruma laiha lista internadu iha oras 24 nia-laran ne’e, tanba sira halo rekomendasaun hodi haruka ba ospitál referrál sira entaun laiha lista moras ne’ebé mak atu ezerse sira-nia direitu votu iha loron eleisaun 19 marsu liuhosi votasaun movel.

Lista internadu hosi ospitál referrál sira hanesan iha Rejiaun Administrativu Espesiál Oé-Cusse Ambeno (RAEOA), Baucau, Ainaro, Bobonaro, Covalima inklui ho HNGV mak hatama lista médiku no enfremeira sira hamutuk 363 no lista pasienta laiha.

“Ho ida-ne’e, ha’u husu ba sira nune’e hatama no sira dehan iha tempu badak sira sei entrega naran mai iha STAE,” nia hateten.

Aleinde estabelese votasaun movel ba pasiente sira iha ospitál sira, prizioneiru sira iha prizaun Becora, Gleno no prizaun Covalima mós hatama lista naran ba STAE no nune’e sira bele tuir votasaun movel.

“Ita-nia maluk sira iha prizaun tolu hanesan Gleno, Covalima no Baucau, ita komunika parte ministériu Justisa no haruka ona naran mai ita, hodi ita garante no administra lori garante sira-nia votu ba iha eleisaun prezidensiál 2022 ne’ebé sei realiza iha 19 marsu ne’e,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here