DILI, 11 marsu 2022 (TATOLI)—Prezidente Republika, Francisco Guterres Lú Olo, kuarta (09 fulan-marsu) ne’e, promulga Dekretu Parlamentu Nasionál Nú. 59/V kona-ba renovasaun ba medida esesionál no temporária hodi hatán vijilánsia sanitária ba pandemia COVID-19, hodi hanaruk vijénsia artigu 3 nian hosi Lei Núo. 24/2021, 19 Novembru.
“Liuhosi Dekretu Parlamentu Nasionál hirak-ne’e mak determina renovasaun ba medida esesionál no temporária hasoru pandemia COVID-19, hodi hanaruk tan prazu vijénsia hosi artigu 3 Lei no. 24/2021 ninian, 19 Novembru, ba loron 120, tuir prevee iha artigu 5 hosi Lei no. 24/2021, 19 Novembru,” refere komunikadu imprensa ne’ebé Agência Tatoli asesu, sesta ne’e.
Tuir Dekretu Parlamentu Nasionál no. 59/V, Parlamentu Nasionál fó autorizasaun ba Konsellu Ministru atu determina, karik presiza, medida esesionás no temporária ba protesaun saúde públika tuirmai ne’e:
- Regra kona-ba distansiamentu sosiál, ema halibur-malu, fase liman no uza máskara no ekipamentu protesaun pesoál selu-seluk, naran katak ekipamentu hirak-ne’e la afeta uza-na’in sira-nia integridade fízika;
- Izolamentu ba ema ne’ebé mak infetadu hosi moras COVID-19 no sira-ne’ebé deskonfia infetadu ona ho SARS-CoV-2 ka moras ho COVID-19, tuir prazu no kondisaun hirak ne’ebé nesesáriu hodi prevene transmisaun SARS-CoV-2 ka moras COVID-19;
- Rekizisaun ba servisu, fasilidade, ekipamentu no ema ne’ebé nesesáriu atu hala’o atividade relasiona ho prevensaun no kontrolu ba pandemia COVID-19;
- Taka temporáriu ka hamenus oráriu atendimentu nian ba públiku iha postu fronteira rai-maran, áerea no tasi nian;
- Kuarentena ba sidadaun sira-ne’ebé hakarak tama mai iha rai-laran, tuir prazu no kondisaun hirak ne’ebé nesesáriu hodi prevene transmisaun SARS-CoV-2 ka moras COVID-19;
- Bandu ema estranjeiru sira tama mai territóriu nasionál bainhira situasaun SARS-CoV-2 ka COVID-19 iha sira-nia territóriu ka rejiaun orijen bele fó risku ida ba saúde públika nian karik importa mai territóriu nasionál;
- Asesu ba fatin ka atividade balun tenke komprova vasinasaun kompleta kontra COVID-19, ka tenke komprova rezultadu negativu iha teste detesaun SARS-CoV-2.
Jornalista : Neslson de Sousa
Editór : Cancio Ximenes
