Kandidatu Prezidente Repúblika, José Manuel Ramos Horta. Imajen Tatoli/Sergio da Cruz.

BOBONARO, 10 marsu 2022 (TATOLI) – Kandidatu Prezidente Repúblika ho númeru sorteiu (14), Jose Manuel Ramos Horta, bainhira eleitu ba Prezidente Repúblika sei serbisu hamutuk ho ógaun ezekutivu lori Timor-Leste sai membru ASEAN.

Militante partidu CNRT no apoiante kandiatura Prezidente Republika, José Manuel Ramos Horta, iha munisípiu Bobonaro. Imajen Tatoli/Sérgio da Cruz.

Ramos Horta ko’alia asuntu ne’e liuhosi kampaña eleitorál iha kampu futeból Maliana no akompaña hosi Prezidente Partidu Congresso Nacional de Recosntrução de Timorense (CNRT), Kay Rala Xanana Gusmao.

Nune’e iha kampaña ho tipu komísiu aberta, Kandidatu hosi partidu CNRT ne’e promete bainhira povu fó fiar asume kargu xefe estadu sei propoin ba governu atu lori Timor-Leste sai membru Association of South East Asian Nations (ASEAN).

“ASEAN importante tebes mai Timor-Leste, ne’e mak ha’u hatete dezáfiu boot maibé oportunidade boot prezidente ida-ne’ebé ho vizaun ho kakutak, matenek ho esperiénsia atubele esplora situasaun ne’e ba Timor nia vantajen, maibé tenke ba ho governu ida-ne’ebé ke matenek ho esperiénsia no koñese rejiaun, liuliu Indonézia tanba nia mak ekonomia boot-liu iha ASEAN tomak, iha tinan 20 tán Indonézia bele sai kuarta mundiál,” nia ko’alia iha Maliana, kinta ne’e.

Ne’e duni Timor-Leste presiza investe iha dezenvolvimentu tenke hanoin saida mak  bele sosa rasik no rekursu alternativa saida mak bele esporta, nune’e bainhira Timor-Leste tama ba ASEAN Timor-Leste nia merkadu millaun ida-resin bele sa’e millaun atus-hitu.

“Maske hasoru dezáfiu sira-ne’e maibé presiza liu governu hametin tán relasaun di’ak ho nasaun viziñu Indonézia tanba Indonézia mak daudaun ne’e sai hanesan nasaun ne’ebé ninia ekonomia boot-liu iha ASEAN,” nia katak.

Prezidente Partidu Congresso Nacional Recosntrucao Timorense (CNRT), Kay Rala Xanana Gusmao, husu ba Bobonaro oan atu vota ba Ramos Horta tanba iha vizaun di’ak no interese hakarak lori povu ba moris di’ak.

“Ohin imi mai hamriik iha-ne’e atu rona atubele halo buat di’ak ba ita nia nasaun tanba ohin ita rona katak hatuur hatuur-hikas Konstituisaun, uluk iha 1999 ita iha opasaun rua katak ida hamutuk ho Indonézia no ida ukun rasik-an, joven sira hanoin didi’ak imi-nia inan-aman barani tebes iha tinan 24 ba vota, ohin ha’u atu koalia ba imi katak prepara-aan ba referendu segundu atubele hadi’a imi-nia moris,” nia katak.

Jornalista   : Sergio da Cruz

Editór         : Evaristo Soares Martrins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here