Kandidata Prezidente Repúblika períodu 2022-2027 ho númeru sorteiru 9, Armanda Berta dos Santos. Imajen Tatoli/Nelson de Sousa.

OÉ-CUSSE, 09 marsu 2022 (TATOLI)—Kandidata Prezidente Repúblika períodu 2022-2027 ho númeru sorteiru 9, Armanda Berta dos Santos, kuarta ne’e, realiza atividade kampaña ho tipu aberta iha eis merkadu Tono, sub rejiaun Pante Macassar, Rejiaun Administrativa Espesiál Oé-Cusse Ambeno (RAEOA).

Armanda Berta hato’o nia kompromisu eleitorál katak bainhira povu fó fiar no eleitu sai Xefe Estadu mak sei ppropoin ba Ezekutivu hodi fó prioridade no hametin timor-oan nia identidade liuhosi promove kultura.

“Hametin timor-oan nia identidade hodi promove kultura, simbólu tradisionál hanesan língua, uma lisan, taís no fiar kristaun ho konfisaun relijiozu ne’ebé Timor-Leste iha hodi hariku identidade nasionál,” Aramanda Berta hateten ba apoiante atus ba rihun ne’ebé partisipa iha kampaña eleitorál ne’e.

Aleinde ne’e, nia dehan, daudaun ne’e Timor-Leste depende hela ba mina-rai ne’ebé loron ida sei maran, tanba ne’e sei fó hanoin nafatin ba Governu atu jere ho loloos ita-nia rikusoin sira-ne’ebé la’ós mina-rai de’it maibé hanesan marmore (marmer), aikameli, kafé no setór produtivu sira seluk tan hodi fó retornu ekonómiku.

Nia promote, bainhira sai Xefe Estadu mak sei halo knar tuir vizaun no misaun ne’ebé hatuur ona iha konstituisaun.

“Se imi fó fiar eleitu nu’udar Prezidente Repúblika mak sei halo tuir ha’u-nia vizaun no misaun ne’ebé hatuur ona iha konstituisaun hodi hametin Estadu Ddireitu Demokrátiku lori progresu prosperidade ba povu tomak nia moris di’ak,” nia dehan.

Apoiante kandidata Prezidente Repúblika períodu 2022-2027 ho númeru sorteiru 9, Armanda Berta dos Santos, partisipa iha kampaña ne’ebé realiza iha RAEOA, kuarta (09/03). Imajen Tatoli/Nelson de Sousa.

Nune’e mós, Prezidente Repúblika sei promove diálogu ho parte hotu hodi hamtein pás no diskute diverjénsia sira hodi lori dezenvolvimentu nasaun ba oin, no garante andamentu dezenvolvimentu liberdade ba sirkulasaun populasaun sira-nian durante oras 24 hodi hala’o atividade saida de’it hanesan negósiu lahó ta’uk ka ameasa.

Xefe Estadu mós sai nu’udar komandante supremu, mak sei fó prioridade hodi fó atensaun másimu ba área defeza no seguransa hodi bele garante Estadu nia soberania, nune’e sei fó hanoin nafatin ba Governu atu kria kondisaun ne’ebé dignu ba instituisaun rua ne’e.

Liga ba relasaun internasionál, knar ida hosi Xefe Estadu nian mak sei hametin kooperasaun ho nasaun viziñu no multilaterál iha mundu hanesan CPLP, ASEAN ne’ebé durante ne’e apoiu Timor-Leste liuhosi área ekonómia, edukasaun no seluk tán.

“Ha’u sei esforsu ho kapasidade tomak servisu hamutuk ho parte hotu no órgaun soberania hanesan Governu, Parlamentu Nasionál, Tribunál Rekursu bele kumpre kompromisu eleitorál ne’e, nia hateten.

Vise segundu partidu KHUNTO, Joaquim Gusmão, hateten kandidata Prezidente Repúblika Armanda Berta iha ona kopasidade, nune’e husu povu Oé-Cusse atu fó apoiu iha eleisaun mai hodi lori ba tuur iha Palásiu Presidente Repúblika hodi servi povu tomak.

Apoiante kandidata Prezidente Repúblika períodu 2022-2027 ho númeru sorteiru 9, Armanda Berta dos Santos, partisipa iha kampaña ne’ebé realiza iha RAEOA, kuarta (09/03). Imajen Tatoli/Nelson de Sousa.

Apoiante feto ida, Margarida Noelbena hateten hanesan apoiante no populasaun depozita konfiansa tomak ba kandidatu Xefe Estadu Armanda Berta nu’udar feto maluk ho iha esperansa boot ho vizaun no misaun ne’ebé hato’o, ho hanoin di’ak ba povu nia moris iha aspeitu oioin hanesan saúde, edukasaun, estrada, bee-moos hodi ko’alia ho Governu atu bele tau atensaun.

Apoiante seluk, Juventus Elo hato’o nia espetativa ba kandidatura bainhira sai PR mak sei kumpre knar hanesan inan ba nasaun tuir de’it lei inan.

Kampaña la’o di’ak

Entretantu, Diretór Komisaun Nasionál Eleisaun (CNE, siglá portugés) Rejiaun Administrativu Espesiál Oé-Cusse Ambeno (RAEOA), Tomás Okui, informa tuir supervizaun kampaña  Kandidatu Prezidente Repúblika períodu 2022-2027 ho númeru sorteiru 9, Armanda Berta dos Santos, ne’ebé realiza iha RAEOA ne’e lao di’ak.

Diretór Komisaun Nasionál Eleisaun (CNE, siglá portugés) Rejiaun Administrativu Espesiál Oé-Cusse Ambeno (Raeoa), Tomás Okui. Imajen Tatoli/Nelson de Sousa.

“Hanoin, kampaña kandidatu PR ho númeru sorteiru 9 tuir oráriu ne’ebé iha hosi inisíu to’o ramata. Situasaun jeralmente la’o di’ak tuir prosedimentu lei eleitorál nian,” Diretór CNE ne’e hateten ba Tatoli hafoin hala’o supervizaun iha fatin kampaña.

Nia husu atu kandidatu Prezidente Repúblika sira kontinua kumpre nafatin prosedimentu kampaña no promove pás iha kampaña tuir mai.

Maske nune’e, tuir sira-nia observasaun nota katak iha kampaña eleitorál ne’e labarik sira barak mak partisipa iha atividade kampaña refere maibé la’ós ekipa susesu mak organiza sira.

“Kampaña la’ós ekipa susesu sira mak mobiliza maibé tanba laiha konsiénsia hosi inan-aman sira mak haruka oan sira atu labele partisipa, no mós iha divertimentu muzíka rame, nune’e labarik ida-idak mós ba partisipa,” nia dehan.

Observa mós kandidatura aprezenta hodi hato’o de’it knaar vizaun ho misaun Prezidente Repúblika no kompromisu eleitorál ba programa.

Entertantu, CNE RAEOA rekruta ona ofisiál na’in-88 hodi destaka iha rejiaun ne’e hodi halo supervizaun ba prosesu kampaña to’o eleisaun.

Iha kampaña eleitorál superviziona hosi Komisaun Nasionál Eleisaun (CNE, siglá portugés), observadór internasionál, Provedória Direitu Umanu no Justisa (PDHJ), no hetan apoiu seguransa másimu hosi Polísia Nasionál Timor-Leste (PNTL), Komandu PNTL munisípiu Oé-Cusse.

Kampaña ne’e kumpre oráriu hosi órgaun eleitorál ne’ebé hala’o iha tuku 14h30 no ramata iha tuku 5:40 lorokraik. Tuir observasaun Tatoli iha terrenu kampaña ne’e partisipa hosi apoiante besik 2.000.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here