Médiku iha Sentru Saúde Vera Cruz halo atendimentu ba labarik sira ho moras dengue, kuarta (09/02). Imajen TATOLI/António Dasiparu

DILI, 09 marsu 2022 (TATOLI)— Tuir dadus estatístika Ministériu Saúde (MS) liuhosi Diresaun Nasionál Saúde Públika, liuliu Departamentu Vijilánsia Epidemolojia, hahú janeiru   to’o horiseik  pasiente dengue sa’e ba 2.921, hosi númeru ne’e labarik na’in-34 mak mate ona.

“Situasaun kazu dengue iha Timor-Leste hosi janeiru mai too horiseik hamutuk kazu 2.921 no kumulativu óbitu na’in-34,” refere nota ne’ebé Agência TATOLI asesu, kuarta ne’e.

Maioria kazu ne’e deteta iha Munisípiu Dili ho totál 1.919, Baucau  125, Manatuto 157, Covalima 92, Ermera ho kazu 90, Manufahi 121,  Viqueque 53, Ainaro 40, Liquiça 86, Aileu  85 , Bobonaro 40,  Lautem 104  no Rejiaun Administrativa Espesiál Oé-Cusse no Ambeno (RAEOA) na’in-tolu  .

Munisípiu Dili nafatin rejista kazu ne’ebe a’as iha semana dahuluk janeiru to’o  fevereiru 2022, ho totál kazu 1.919. Enkuantu iha semana ikus ne’e kazu komesa menús daudaun.

To’o ohin loron desimu primeiru semana fulan marsu, kazu dengue  hosi  postu administrativu Dom Aleixo iha 1.033 , Cristo-Rei 384, Vera-Cruz 220, no Na’in-Feto 239.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 348, Klínika Fatumeta 232, Sentru Saúde Comoro 604, Sentru Saúde Vera-Cruz 141, Sentru Saúde Formoza 321, Sentru Saúde Becora 228, Klínika Madre Eliza na’in-ida, Sentru Saúde Atauro 11, Sentru Saúde Metinaro 25, Klínika Bairru-Pité 25, Klínika Motael na’in-ida no Klínika Moris Foun mós na’in-ida.

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Notísia relevante: Surtu dengue: óbitu na’in-33 no pasiente sa’e ba 2.555

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here