Feto PNTL sira hosi nasionál no munisípiu Liquiça la’o hela ho espanduk hodi selebra loron internasionál feto iha munisípiu Liquiça, imajen TATOLI/Hortencio Sanchez

LIQUIÇA, 08 marsu 2022 (TATOLI)— Komandu Jerál Polisia Nasionál Timor-Leste (PNTL), deside selebra loron mundiál ba feto iha munisípiu Liquiça ho tema “Hamutuk ita hametin iguldade jéneru, liuhosi prevensaun agresaun seksuál no asedu seksuál”.

Biban ne’e, Komandante Jerál PNTL, Komisáriu Faustino da Costa, hateten, razaun hili munisípiu Liquiça sai hanesan fatin hodi selebra loron internasionál feto tanba úniku munisípiu ida ne’ebé komandante feto mak lidera.

Komandante Jerál PNTL Faustino da Costa asina hela paktu PNTL nian hodi dehan la’e ba asédiu seksuál. Imajen TATOLI/Hortencio Sanchez

“Ha’u parabeniza feto Timor-Leste no mundu tomak ne’ebé selebra loron espesiál ne’e. PNTL ho esperansa atu fó hanoin ba ema hotu atu tau iha konsiénsia hodi labele hamosu asedu seksuál iha fatin ne’ebé de’it no tenke valoriza no respeita feto sira,” Komandante Jerál PNTL, Komisáriu Faustino da Costa, hateten liuhosi intervesaun iha selebrasaun eventu mundiál ne’e iha Hotel Alma do mar iha suku Maumeta, postu administrativu Bazartete, Liquica, tersa ne’e.

Notísia relevante:  PM parabeniza loron mundiál feto no espera bele sai reflesaun

Iha biban hanesan, komandante Departementu Jéneru PNTL, Superintendente Julia da Gama, hateten lori feto hotu iha PNTL hato’o parabéns ba feto mundu tomak espesiál ba feto sira iha Timor-Leste ne’ebé hela iha área rurál.

Daudaun ne’e, partisipasaun feto iha PNTL 13% tuir dadus ne’ebé aprezenta hosi Sekretária Estadu Iguldade Jéneru no Inkluzaun.

Feto PNTL na’in-608 mak ativu hela hala’o servisu hanesan membru PNTL iha nivél nasionál no munisípiu. Hosi númeru ne’e iha na’in 79 mak asume hela kargu hanesan komandante iha postu no Diresaun ida-idak iha instituisaun PNTL nia laran.

Iha ámbitu, selebrasaun ne’e asina mós akta deklarasaun polítika hosi PNTL hotu atu halo prevensaun ba asedu seksuál.

Selebrasaun ne’e partisipa hosi parseiru internasionál sira iha Timor-Leste, autoridade lokál, estudante Universidade da Paz no estudante ensinu sekundáriu sira iha Liquiça hotu.

Notísia relevante: Loron Mundiál ba Feto: feto Lautém komprometidu hakotu dsikriminasaun

Jornalista : Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here