Kandidatu Prezidente Repúblika, Francisco Guterres Lú-Olo. Imajen Tatoli/Celestina Teles.

COVALIMA, 07 marsu 2022 (TATOLI)—Kandidatu Prezidente Repúblika ho númeru sorteiu 6, Francisco Guterres Lú Olo, hateten se povu fó fiar reeleitu ba prezidente repúblika mak nia sei hametin relasaun institusionál.

Lú Olo hateten, prezidente nia kna’ar no kompeténsia konstituisaun mak fó ba nia hodi hametin relasaun instituisionál entre prezidente repúblika ho Parlamentu Nasionál (PN), Governu no Tribunál hodi reprezenta komunidade tomak iha komunidade internasionál nia oin.

Apoiante hosi kandidatu Prezidente Repúblika númeru sorteiu 6, Francisco Guterres Lú Olo, partisipa iha kampaña eleitoral iha Covalima. Imajen Tatoli/Celestina Teles.

“Ha’u hakarak kandidata ba PR no ha’u reeleitu  ba Prezidente Repúblika, ha’u hakarak atu garante nafatin funsionamentu instituisaun hotu ho normál, relasaun instituisionál entre Parlamentu Nasional  ho Prezidente Repúblika, Governu ho   Tribunál sira, sei buka hametin no hadi’a liuhosi diálogu ne’ebé permanente hot-hotu hatene  hatene ida-idak nia knar  ita hotu hamutuk atu la’o ba oin,” Francisco Guterres Lú Olo hato’o liuhosi Kampaña Eleitorál ne’ebé realiza iha Kampu Ladi, Covalima, segunda ne’e.

Atu hadi’a relasaun instituisionál liuhosi diálogu ne’e ho intensaun hotu-hotu bele hatene ida-idak nia knar, nune’e hamutuk bele la’o ba oin.

Lú-Olo hasai nia desizaun atu rekandidata an ba Prezidente Repúblika iha loron 16 fulan-janeiru, iha munisípiu Ermera liuhosi vontade militante hamutuk 1025 mak hakarak nia atu sai fali kandidatu ba PR.

“Hosi munisípiu Covalima apoiante 6100 mak haruka naran hodi apoiu ha’u. Ha’u haksolok Suai fó kbiit tomak atu hakat dala ida tan sai PR ba povu tomak. PR nia hun mak kumpre konstitusaun no ita nia lei sira vigora iha Timor-Leste. Konstitusaun mak estatutu politiku nia hun no abut, halo ita sai nasaun soberanu,” nia dehan.

Iha kampaña eleitorál ne’e Partidu Os Verdee no Movimentu Klandestina Kolimau 2000 mós  deklara fó apoiu ba kandidatu Prezidente Repúblika Francisco Guterres Lú Olo ba períodu 2022-2027.

“Ami mai iha ne’e la’ós partidu. Ami iha movimentu klandestina kolimau 2000 hodi fó apoiu ba kandidatu ho númeru soteriu 6, tanba líder ne’ebé mak halo nasaun hakmatek mak kandidatu PR Francisco Guterres Lú Olo,” Koordenadór Movimentu Klandestina Kolimau 2000, Elizario Gusmão, hateten. 

Iha komísiu ne’e hetan supervizaun hosi Komisaun Nasionál Eleisaun, Provedoria Direitu Umanu no Justisa (PDHJ) no obervadór internasionál hodi haree prosesu hotu, inklui Lei Eleitorál nian hodi bele fó susesu ba iha kampaña tinan ida-ne’e.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here