Militante no simpatizante Partidu Demokrártiku munisípiu Bobonaro partisipa iha kompaña ba dala-haat hosi kandidatu Prezidente Repúblika, Mariano Assanami Sabino Lopes. Imajen Tatoli/Sérgio da Cruz.

BOBONARO, 06 marsu 2022 (TATOLI)—Kandidatu Prezidente Repúblika períodu 2022-2027 ho númeru sorteiu 16, Mariano Assanami Sabino Lopes, domingu ne’e realiza atividade kampana ba dala-haat (4) ho tipu mkampaña aberta ne’ebé realiza iha suku Holsa, postu adminístrativu Maliana, munisípiu Bobonaro.

Kandidatu Prezidente Repúblika períodu 2022-2027, Mariano Assanami Sabino Lopez. Imajen Tatoli/Sérgio da Cruz.

Assanami hateten, bainhira povu fó fiar asume kargu hanesan Xefe Estadu mak sei promove diálogu ho governu oinsá mak bele kria polítika ne’ebe di’ak atu mordeniza instituisaun FALINTIL-Forsa Defeza Timor-leste (F-FDTL) liuhosi kapasitasaun rekursu umanu hodi bele servi ba instituisaun ho Estadu, nune’e bele asegura soberania Timor-Leste hahú hosi fronteira rai-maran, tasi no lalehan.

“Ita hakarak forsa ida-ne’ebé forte no forsa ida-ne’ebé moderna hodi hola parte mós iha prinsípiu no hola parte mos iha rejionál sira, katak ne’e tenke servisu hamutuk ho nasaun sira hanesan Indonézia ho Austrália nomós nasaun viziñu, nune’e ita bele kontrola ita-nia tasi no lalehan, ita hakarak forsa ida-ne’ebe sai lutu nasaun no labele sai forsa ida-ne’ebé fó ameasa fali ba povu,” nia hateten.

Aleinde ne’e, Assanami mós promote sei kria polítika negósiu estranjeiru di’ak atu destaka Embaxadór iha nasaun hotu-hotu hodi bele dada investidór internasionál sira atu mai investe iha Timor-Leste no fó oportunidade ba Governu atu uza kompañia Estadu nian ba investe fali rekursu alternativa sira iha rai-li’ur, nune’e bele hatama reseita ba nasaun hodi hasa’e ekonomia rai-laran.

Nune’e, nia dehan, bele kria kampu traballu ba juventude millennial hó saláriu ne’ebé adekuadu no hasa’e saláriu mínimu funsionáriu sira-nian hanesan profesór, médiku no seluk tan tanba saláriu báziku atuál la sufisiente ba funsionáriu sira atu goza no atende nesesidade uma-laran no prepara ba oan sira-nia futuru.

“Ita hotu-hotu bele sente katak rai ida-ne’e, rai numeru um (1) iha país ida-ne’e. Tanba ne’e, ita hakarak polítika diplomásia ida-ne’ebe bele hametin liután relasaun ho nasaun maun-alin CPLP ho nasaun sira-ne’ebe viziñu liu-liu Indonézia ho Austrália no nasaun sira-ne’ebé amigu ho ita hanesan Amérika no Xina,” nia dehan.

Assanami promote sei promove diálogu ho Governu hodi kria polítika ida atu fasilita banku kréditu ida-ne’ebe halo lalais, nune’e povu bele fila-liman liu-liu joven sira-ne’ebé iha inisiativa atu loke insdústria no fábrika, nune’e bele hadi’a povu ekonomia no halakon pobreza iha Timor-Leste.

Bainhira asume kargu nu’udar Xefe Estadu, nia hakarak odomatan Palásiu Prezidente Bairru Pite tenke nakloke tomak ba ema hotu, hodi nune’e bele povu nia preokupasaun hodi bele kontrola no tun direta ba haree negosiante sira-ne’ebe fila-liman hanesan faan katupa, ikan no negosiante ambulante sira iha tasi ibun atu bele hatene kondisaun real ne’ebe sira enfrenta.

Nia sei propoin ba Governu atu konstrui sintina públiku iha dalan ninin, nune’e bele fasilita ema hotu labele soe fo’er iha ai-laran tuan arbiru de’it ho trata povu nia dignidade hanesan ema ne’ebe sivilizadu.

Ekipa Susesu Kandidatu numeru sorteiu 16 iha munisípiu Bobonaro, Julio Carvalho Caeiro, husu ba ekipa sira iha baze atu esforsu hodi servisu makaas liután hodi bele fó vitória ba Mariano Aasanami Sabino Lopes iha eleisaun prezidensiál 2022, nune’e bele konkretiza kandidatu nia mehi atu bele implementa programa sira-ne’ebe trasa ona.

Ekipa Susesu kandidatu Prezidente Republika numeru sorteiu 16 husi munisipiu Bobonaro, Julio Carvalho Caeiro. Imajen Tatoli/Sérgio da Cruz.

“Maun-alin Bobonaro oan sira, tempu to’o ona katak ita hanoin ona ba oin, ita labele garantia ba jerasaun tuan sira tanba sira-nia tempu liu ona. Agora, ita-nia tempu atu fó jerasaun foun mak ukun, nune’e nia bele foku liu ba dezenbolvimentu hodi ita hotu bele sente duni ukun an ida-ne’e,” nia dehan.

Iha kampaña eleitorál ba loron dalima ne’e, hetan partisipasaun másimu hosi militante no apoiante sira hosi postu adminístrativu Atabae, Balibo, Cailaco, Maliana, Bobonaro no postu adminístrativu Loloto’e.

Iha komisiu ne’e hetan mos supervizaun hosi Komisaun Nasionál Eleisaun (CNE) no observadór internasionál hosi Uniaun Europeia (UE) no Provedoria Direitu Humanus no Justisa (PDHJ) no hetan seguransa másimu hosi Polísia Nasionál Timor-Leste (PNTL) Komandu Munisípiu Bobonaro hodi haree prosesu hotu, inklui lei eleitorál niaa atu bele fó susesu ba iha kampaña eleitoral ne’e.

Jornalista : Sérgio da Cruz

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here