Komandante PNTL Munisípiu Viqueque, Superintendente Polísia Sebastião Alves Quintão. Imajen Tatoli/Vitorino da Costa Lopes.

VIQUEQUE, 04 Marsu 2022 (TATOLI) – Komandu Polísia Nasionál Timor-Leste (PNTL) Munisípiu Viqueque kaptura joven na’in-tolu tanba tenta halo asaun no hakanek simpatizante hosi kandidadu Prezidente Repúblika balun.

Komandante PNTL Munisípiu Viqueque, Superintendente Polísia Sebastião Alves Quintão, informa, polísia kaputura joven na’in-tolu ho kondisaun lanu ne’ebé  halo asaun hasoru simpatizante hosi kandidatu balun iha suku Makadique, postu adiministrativu Uatulari.

“Iha sesta ne’e simpatizante sira hosi kandidatu balun hosi Uatulari tún mai Viqueque Vila hodi partisipa kampaña. Depois kampaña parte seguransa mós akompaña, to’o iha área suku Macadique, joven na’in-tolu ho kondiasaun lanu halo provokasaun ba militante hosi kandidatu ne’e.  Iha mometu ne’e, ami kaptura kedas suspeitu na’in-tolu hodi tau iha sela, depois halo prosesu identifikasaun ba kazu ne’e, ita konsidera flagrante delitu,” nia informa ba Agência TATOLI, iha Viqueque, sábadu ne’e.

PNTL detein hela suspeitu na’in-tolu iha sela postu Uatulari, tanba lei fó dalan ba Polísia Invetigasaun halo identifikasaun durante oras  12 nia laran.

“Iha prosesu identifikasaun iha 12 oras nian depois ami mós husu autorizasaun hosi Ministériu Públiku (PM) hodi haree. Hosi kazu ne’e ha’u bele dehan ita kompleta ona dokumentu sei aprezenta ba Ministériu Públiku hodi hola dezisaun,” nia dehan.

Akontesimentu daruak  akontese tán ba simpatizante hosi kandidatu balun ne’ebé tún hosi Uatulari partisipa kampaña iha munisípiu Viqueque depois simpatizante sira fila ho karreta iha tempu kalan.

“Ema deskoñesidu tuda simpatizante hosi kandidatu ne’e iha tempu kalan. Ida-ne’e maka ami la konsege kaptura, maibé ami deskonfia ona autór balun ne’ebé ami sei bolu hodi presta deklarasaun,” nia relata.

Komandante PNTL Munisípiu Viqueque ne’e fó-sai katak, atividade kampaña eleitorál Viqueque Vila la’o ho hakmatek tanba  PNTL kontinua halo vijilánsia iha fatin kampaña ho rútina.

“Ami mantein nafatin seguransa hodi asegura estabilidade iha munisípiu Viqueque. Ha’u apelu ba komunidade sira atu kontribui ba autoridade seguransa hodi asegura estabilidade iha tempu kampaña to’o eleisaun 19 marsu”, nia apela.

Kronolojia hosi kazu ne’e katak simpatizante sira viajen hosi Viqueque Vila to’o área Uatulari mezumenus tuku 16:00  no akontesimentu daruak rezulta simpatizante na’in-tolu hetan kanek hosi kandidatu balun.

Enfermeira Postu Saúde Uatulari ne’ebé fó tratamentu, Maria Ximenes, relata iha akontesimentu ne’e ema na’in-tolu hetan kanek hosi simpatizante balun hosi suku Babulu no  na’in-ida hosi simpatizante balun tán hosi suku Vessoru.

“Ema na’in-tolu ne’ebé kanek ne’e mane, na’in-rua maka hetan kanek iha parte ain hotu no simpatizante hosi kandidatu ida tán kanek iha tilun parte-loos, iha kanek ne’e suku pontu-lima tanba nia tilun nakles,” Maria informa.

Jornalista   : Vitorino Lopes da Costa

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here