OÉ-CUSSE, 04 marsu 2022 (TATOLI) – Implementasaun Zona Espesiál Ekonomia Sosiál Merkadu (ZEEMS) hahú hosi 2015 to’o 2022, hatudu mudansa persentajen liña pobreza ba populasaun nia moris hosi aspetu hotu.
Konstituisaun RDTL artigu 71 (Organizasaun administrativa) númeru 2 fó dalan ba Oe-Cusse hala’o nia knaar tuir polítika administrativa ho rejime ekonómiku espesiál. Ho baze ida-ne’e hamosu Lei númeru 3/2014, 18 juñu kona-ba krisaun Rejiaun Administrativa Espesiál Oe-Cusse Ambeno no estabelese Zona Espesiál Ekonomia Sosiál Merkadu.
Mandatu hahuluk lidera hosi Mari Alkatiri, kontinua hosi José Luis Guterres no oras ne’e lidera hosi Arsénio Paixão Bano.
Prezidente Autoridade RAEOA, Arsénio Paixão Bano, kontente no orgullu tanba implementasaun Zona Espesiál Ekonomia Sosiál Merkadu (ZEEMS) hahú hosi 2015 to’o 2022, hatudu mudansa ba persentajen liña pobreza iha popuplasaun nia moris iha aspetu hotu.
Ezekutivu ne’e garante tanba kompara ho tinan hitu kotuk, populasaun Oé-Cusse enfrenta problema barak iha iluminasaun eletrisidade, bee-moos, edukasaun, saúde, infraestrutura bázika, nesesidade bázika, transporte marítima no aéreu.
“Infraestrutura bázika harii iha territóriu Oé-Cusse ne’e 62,2% ne’ebé aas iha 2014, maibé ita problema ho dadus, atu hatene liña pobreza nia mudansa oinsá, maibé ita haree, mudansa iha vida populasaun, kompara ho tinan hirak ba kotuk, buat hotu-hotu konsentra iha nasionál, maibé durante tinan hitu, autoridade konsege rezolve ona problema barak iha Oé-Cusse, liuliu infraestrutura bázika,” Arsénio Paixão Bano, informa ba Agência Tatoli iha Oé-Cusse, sesta ne’e.
Tuir nia, Oé-Cusse nia mudansa mak liña eletrisidade ne’e fó vantajen tanba fatin izoladu sira mós hetan ona naroman, hodi muda povu nia moris liuhosi atividade ekonomia, saúde no edukasaun.
Arsénio Bano kompara 2015 ba kotuk, eletrisidade iha Oé-Cusse lakan iha kalan de’it maibé oras neen de’it tenke hamate, família uma-kain te’in de’it difisil, oan sira uluk enfrenta difikuldade estuda iha kalan, agora laiha problema tanba lakan oras 24.
“Entaun ha’u haree iha duni mudansa, iha uma barak harii iha iha tinan-hitu nia laran hosi 2015 mai, iha asesu ba estrada, saúde, edukasaun tanba autoridade loke iha fatin hotu-hotu, tán ne’e mudansa hirak-ne’e fó benefísiu ba vida ema-nian, ita harii eskola iha fatin hotu-hotu, labarik barak asesu ona eskola, entaun ita garante Oé-Cusse iha mudansa,” Arsénio hateten.
Autoridade AREOA esforsu atu rezolve bee-moos no setór sira seluk, Oé-Cusse iha mudansa tanba iha tinan 2020-2021, bainhira povu Oé-Cusse hetan krize bee-moos, tanba udan-been menus, no prestasaun serbisu ladún kobre hotu to’o nível suku no aldeia, entaun autoridade hahú halo distribuisaun bee ba komunidade atu muda hosi krize ne’e hahú distribui ho litru 300,000 kada loron uza karreta tanki dezloka ba fatin sira-ne’ebé presiza.
Maibé iha tinan 2022 autoridade distribui de’it litru 5000 mai kraik kada loron, ida-ne’e hatudu katak iha mudansa, maibé iha mudansa balun liuhosi perfurasaun sistema bee-moos. Tanba tinan kotuk autoridade loke perfurasaun iha suku Cunha, aldeia Noafafo, bairru Sonamnasi, iha Nemun, suku Taiboko.
Nune’e mós iha Noa-Ana, suku Lela-Ufe, Oénunu, suku Suni-Ufe no fatin seluk tán, maibé iha zona sentrál tenke halo manutensaun tanba iha vila laran hanesan Palaban, Numbei balu iha fallansu, bee ladún kobre hotu fatin hirak-ne’e.
Nia relata, esforsu progresu serbisu autoridade halo iha tinan 2021, autoridade halo konservasaun ba bee-matan sira iha teritóriu Oé-Cusse, agora iha tinan 2022 ne’e iha duni rezultadu tanba bee-matan sira hahú moris, entaun fasil ba populasaun asesu ba bee-moos ho di’ak.
“Ida-ne’e ita halo progresu maka’as iha-ne’e, tanba ita investe tempu barak ba konservasaun bee-moos iha bee-matan sira,” nia katak.
Purtantu, alokasaun Orsamentu Jerál Estadu (OJE) 2022 ba Rejiau Administrativa Espesiál Oé-Cusse Ambeno hamutuk $84,436,784.00.
Entretantu Agência Tatoli asesu iha livru 3C Orsamentu Jerál Estadu (OJE) 2021, bazea ba mapa planeamentu ba dezenvolvimentu ekonomia komunidade iha RAEOA, tuir dadus peskiza hosi Timor-Leste Living Standard Survey iha tinan 2014 hatudu katak indise liña ki’ak iha RAEOA atinje 62.2%, hatudu katak fó atensaun maka’as ba planeamentu dezenvolvimentu rejiaun nian, ba ekonomia komunidade tanba pobreza liña ki’ak ladún di’ak.
Nune’e mós bazea ba dadus estatístika sensu populasaun no uma-kain tinan 2015, proporsaun uma-kain idade 15-59 ekonomikamente la-ativu (la-serbisu, katuas, moras, estudante no seluk tan), hatudu katak RAEOA iha nivél suku balun hanesan suku Beneufe, Suniufe perténsia sub-rejiaun Nítibe.
Nune’e mós iha sub-rejiaun Oésilo suku Usitaqueno no sub-rejiaun Pásabe iha suku Malelat, populasaun ho idade 15-59, ekonomikamente la-ativu hetan de’it 19.99% mai kraik, enkuantu iha suku 13 seluk hetan 39.99% de’it.
Enkuantu iha sub-rejiaun Pante Makasar, suku Nipani, Costa no Naimeco hatudu katak proporsaun populasaun idade 15-59 ekonomikamente la-ativu atinje 40-59.99% hetan di’ak uitoan.
Jornalista : Abílio Elo Nini
Editór : Evaristo Soares Martins
