Ámbitu kampaña Kandidatu PR períodu 2022-2027, José Ramos Horta, iha kampu Waibua eis kampu militár, munisípiu Viqueque, sesta (04/03). Imajen TATOLI/Jogerjo Guterres

VIQUEQUE, 04, marsu 2022 (TATOLI)–Kandidatu Prezidente Repúblika (PR), ho númeru sorteiu 14, José Ramos Horta, kompromete bainhira hetan fiar hosi povu, serbisu dahuluk ne’ebé sei halo maka diálogu ho partidu polítiku sira ne’ebé hetan asentu parlamentár.

Kandidatu PR períodu 2022-2027, José Ramos Horta, hato’o nia kompromisu no prioridade sira durante kampaña iha kampu Waibua eis kampu militár, munisípiu Viqueque, sesta (04/03). Imajen TATOLI/Jogerjo Guterres

“Ha’u espera Viqueque hamutuk ho munisípiu seluk fó mandatu iha ronde dahuluk, iha loron 19 marsu iha loron votasaun, nune’e kalan ita komesa hatene ona votasaun ne’e ba ne’ebé, no loron 20 marsu hatene ona sé mak manán no rezultadu ofisiál sei fó sai hosi Tribunál Rekursu, karik konfirma númeru sorteiu 14, entaun ha’u rasik no ha’u hahú kedas diálogu informál ho partidu hotu,” Kandidatu PR José Ramos Horta, hateten iha ámbitu kampaña, iha kampu Waibua eis kampu militár, munisípiu Viqueque, sesta ne’e.

Notísia relevante: Abertura kampaña iha Lautém, Horta introdús prioridade haat

Horta konsidera, presiza hala’o diálogu tanba atu rezolve violasaun Konstituisaun Repúblika Demokrátiku Timor-Leste (RDTL), kona-ba funsionamentu Parlamentu no asuntu seluk.

Prezidente CNRT, Kayrala Xanana Gusmão, hato’o nia apoiu ba Kandidatu PR, José Ramos Horta, durante kampaña iha kampu Waibua eis kampu militár, munisípiu Viqueque, sesta (04/03). Imajen TATOLI/Jogerjo Guterres

“Iha ne’ebá ha’u husu solusaun saida mak ita-boot sira hakarak, mediante sira-nia opiniaun ha’u rona, tetu, konsulta hafoin Prezidente Repúblika halo desizaun. Sempre buka diálogu, toleránsia, hakuak hotu, rai ida-ne’e laiha fatin atu iha inimigu, rai ida ne’e tenki buka hakuak malu, ha’u labele halo buat seluk,” Premiadu Nobel Paz ne’e dehan.

Iha sorin seluk, eis Diplomata ne’e haktuir, nia hetan konvite iha outubru 2021, hodi bá Roma tamba hola parte hanesan juri internasionál ida naran fraternidade umana.

“Ho nune’e, ha’u simu kompromisu promove fraternidade umana, ha’u labele halo buat seluk, la’ós tanba ida-ne’e de’it maibé tanba ha’u-nia vida mak sempre buka toleránsia fraternidade umana, tantu iha Timor-Leste no mundu,” nia tenik.

Iha fatin hanesan, Veteranu, Gil da Costa ‘Oan Soru’, husu ba Viqueque-oan sira atu hahú ohin ba-oin tenki brani, tanba uluk Viqueque-oan barak mak brani fó-an mate hodi sosa independénsia.

“Ohin loron tenki brani hodi define, defende no deside nasaun ne’e atu la’o loos, tanba ne’e maka lalika hakfodak maibé tenki fihir loloos kandidatu ne’ebé ho kapasidade a’as hodi hadi’a nasaun nia imajen iha mundu,” nia hato’o.

Atuál membru VIII Governu ne’e mós husu ba povu Viqueque, liuliu joven sira, bainhira atu tama iha vida polítika la presiza jura.

“Bele jura iha organizasaun rituál, maibé labele jura iha polítika tanba ne’e demokrasia mate,” Oan Soru fó hanoin.

Enkuantu, kampaña Kandidatu PR hetan apoiu másimu hosi Partidu Congresso Nacional de Reconstrução de Timor(CNRT) iha Viqueque no la’o ho situasaun hakmatek no pasífika tanba hetan seguransa másima hosi Polísia Nasionál Timor-Leste (PNTL) no observasaun hosi Observadór Uniaun Eropeaia, Komisaun Nasionál Eleisaun (CNE, sigla portugés), Provedoria Dereitu, Umanu no Justisa (PDHJ), Instutu ba Defeza Direitu kriansa (INDDICA, sigla portugés).

Antes ne’e, hafoin restaurasaun independénsia, José Ramos Horta eleitu nu’udar Prezidente Repúblika daruak ba períodu 2007-2012 hosi Independente.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here