Ró peska no traballadór mout bainhira halo hela serbisu, iha tasi, Koreia Súl, kuarta (02/03). Imajen/Espesiál

DILI, 03 marsu 2022 (TATOLI)–Traballór timor-oan, Armando Abel do Santos, ne’ebé horiseik (02/03) tuku 05:00 madrugada hetan insidente hamutuk ho traballadór indonésiu ida no kapitaun ró ida, ne’ebé mout iha tasi Koreia Súl, hakotu iis iha tuku 16:00 horiseik iha Ospitál Koreia Súl.

Marcos Mateus Lopes, nu’udar traballadór timor-oan ne’ebé horiseik iha lokál akontesimentu, haktuir, Armando Abel inklui kolega na’in-rua, bainhira autoridade responsávele hasai hosi tasi, haree ba kondisaun todan tanba isin mamar hotu.

“Maibé, ami labele fó sai dehan sira mate tanba iha ne’e akontese beibeik ona no médiku sira bele salva fali, entaun horiseik lori sira ba ospitál no tau mákina hodi hasai tasi-been, maibé la konsege salva to’o tuku 16:00 lorokraik, parte ospitál fó informasaun ba ami katak sira na’in-tolu ne’ebé mout ne’e mate hotu,” Sasin ba akontesimentu ne’e konta tuir ba Agência TATOLI, via telefónika, kinta ne’e.

Notísia relevante: Traballadór timor-oan ida mout iha tasi Koreia Súl

Kona-ba prosesu transportasaun mate-isin mai Dili sei iha prosesu nian laran, tanba horiseik reprezentante Governu Timor-Leste iha Koreia Súl liuhosi Adidu ho Embaixadór vizita ona mate-isin.

“Ami labele hatene prosesu transportasaun mate-isin tanba ida-ne’e serbisu entre Governu Timor-Leste no Koreia Súl,” nia akresenta.

Matebian Armando Abel do Santos hosi postu administrativu Cailaco, munisípiu Bobonaro, no nia ba serbisu iha Koreia Súl iha loron 23 outubru 2019, ho durasaun kontratu tinan-tolu.

Iha parte seluk, Diretór Jerál Sekretaria Estadu Formasaun Profesionál no Empregu (SEFOPE), Paul Alves, hateten, tanba insidente ne’ebé envolve traballadór timor-oan, horiseik hanesan loron sinzas, tanba ne’e nia parte seidauk simu relatóriu loloos hosi Adidu.

“Maibé tuir informsaun, bainhira traballadór ida mate Governu nasaun rua sei halo esforsu másimu transporta mate-isin mai nia rai,” nia dehan.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here