Kandidatu Prezidente Repúblika períodu 2022-2027, Tenente Jerál Reformadu, Lere Anan Timur, hamutuk ho espoza no komitiva, partisipa misa agradesimentu ba loron veteranu no kandidata-an kompete iha Eleisaun Prezidensiál, iha Igreja Ti'i Lou Imaculada Conceição, Viqueque, kinta (03/03). Imajen TATOLI/Vitorino Lopes da Costa

VIQUEQUE, 03 marsu 2022 (TATOLI)–Iha loron nasionál veteranu iha 03 marsu, Kandidatu Prezidente Repúblika (PR) períodu 2022-2027, ho númeru sorteiu 08, Tenente Jerál Reformadu, Lere Anan Timur, husu misa agradesimentu ba eroi no eroina sira, ne’ebé fó kontribuisaun ba luta libertasaun.

Misa agradesimentu ne’e realiza tuku 08:30 no ramata tuku 10:15, prezide hosi Amu selebrante, Padre Vigáriu Tiago da Costa, ne’ebé konsidera misa ne’e hodi relebra fali eroi sira hotu no hasa’e orsaun ba Maromak.

“Loron ohin importantete tebes ba ita-nia veteranu, tanba ne’e presiza hasa’e orasaun ba eroi sira ne’ebé luta ba libertasaun Timor-Leste hosi tinan 1975 to’o 1999,” Padre Vigáriu Tiago da Costa iha ninia omília são Lucas, durante misa agradesimentu ba loron veteranu, iha Igreja Ti’i Lou Imaculada Conceição, Viqueque, kinta ne’e.

Notísia relevante: Veteranu Viqueque triste Governu la komemora loron veteranu

Padre Tiago apresia, maski Kandidatu Lere Anan Timur ho ninia komitiva tomak halo kampaña eleitorál iha munisípiu Viqueque, maibé molok hahú la haluha hasa’e agradese ba Maromak no husu deskansu internu ba eroi pátria sira.

“Timor-Leste hetan independénsia tinan-20 ne’ebé hanesan joven ona, maibé nasaun sei infantil ne’ebé la’o ain kadik. Ha’u hanoin tempu agora tempu ba Lere Anan Timur ba Kandidatu Prezidente Repúblika, hodi bele foti dezisaun. Hosi ita-boot ninia kandidatu, povu bele fuan monu ba ita-boot bainhira eleitu ba Prezidente no hamutuk ho veteranu sira hodi hadi’a no hametin aliserse nasaun,” nia akresenta.

Iha fatin hanesan, Tenente Jenerál Reformadu, Lere Anan Timur, konsidera, loron 03 marsu 1981 hanesan loron importante ba istória Timor Leste, liuliu iha Maubai, Viqueque.

“Iha tempu ne’ebá, ha’u mós hola parte hodi re-organiza funu libertasaun nasionál. Molok baze apoiu rahun no ita hotu hatene katak bainhira baze apoiu rahun, ita-nia líder ne’ebé lidera funu mate hotu no forsa namkari. Tanba ne’e, deside loron 03 marsu sai nu’udar loron veteranu sira-nian,” nia haktuir.

Tanba ne’e, nia husu misa ba selebrasaun loron veteranu no husu misa ba ninia susesu Kandidatu PR ba períodu 2022 to’o 2027.

Misa ne’e partisipa hosi Lera Anan Timur ho ninia espoza, veteranu Cornélio Gama ‘L7’ inklui ekipa susesu Kandidatu PR.

Kari ai-funan iha semitériu Cararas

Kandidatu Prezidente Repúblika períodu 2022-2027, Tenente Jerál Reformadu, Lere Anan Timur, hamutuk ho espoza no komitiva kari ai-funan iha Cruz boot simitériu Cararas, Viqueque, kinta (03/03). Imajen TATOLI/Vitorino Lopes da Costa

Hafoin ramata misa, Lere Anan Timur ho ninia ekipa kontinua viajen ba semitériu Cararas hodi kari ai-funan no sunu lilin ba eroi libertasaun sira iha Cruz boot, hafoin kontinua bá vizita Osoáriu no vizita Muzeu Rezisténsia Cararas.

Nune’e, hafoin atividade hotu, Kandidatu PR ho ekipa kontinua halo kampaña iha tuku 14:00 to’o ramata, ne’ebé hetan supervizaun hosi Komisaun Nasionál Eleisaun (CNE, sigla portugés), observadór internasionál hosi União Europeia (UE) no akompaña seguransa hosi Polísia Nasionál Timor Leste (PNTL).

Iha fatin ketak, Diretór CNE munisípiu Viqueque, Honorio Cruz da Silva, hateten, Kandidatu PR ho númeru sorteiu 08 ne’e, tuir oráriu halo kampaña kinta ne’e tuku 08:00 dader to’o tuku 10:00, maibé tanba ohin halo atividade, nune’e kampaña hahú fali tuku 14:00.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here