Prezidente CNE, José Agostinho da Costa Belo. Imajen TATOLI/António ‘Dasiparu’ Gonçalves.

DILI, 03 marsu 2022 (TATOLI)–Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten ekipa kandidatu Prezidente Republika sira mak mobiliza labarik sira hatais faru partidu nian tuir kampaña eleitorál ne’e konsidera kontra regra.

Nia hatutan, ba labarik sira-ne’ebé mai ho inan-aman no mai mesa-mesak haree kampaña ne’e la viola lei eleitorál.

“Kandidatu PR mobiliza labarik iha kampaña eleitorál karik ka kandidatu PR tula labarik iha karreta kampaña nian mak ita konsidera kontra regra. Ha’u hanoin labarik livre ba haree ema halo kampaña iha lokál tanba dala ruma kampaña ne’e besik labarik sira-nia uma, ne’ebé ha’u hanoin bele hela la kontra regra ruma iha ne’e. Anaunser labarik uza farda partidu nian ka sa’e karreta hamutuk mak ha’u hanoin labele. Tanba, dala barak mós tara tais ba kandidatu sira-ne’e mesak labarik kiik oan sira,” José Agostinho da Costa Belo informa ba Agência TATOLI, via telefónika, kinta ne’e.

Bazea ba observasaun CNE nian iha terrenu, nia informa, iha duni labarik barak mak marka prezensa maibé labarik hirak ne’e la’ós ba tuir kampaña, maibé sira ba haree ema boot sira halo kampaña ne’e la kontra regra.

Kona-ba alterasaun kalendáriu kampaña, Prezidente CNE ne’e hateten, alterasaun kalendáriu kampaña ba kandidatu Prezidente Repúblika balun tanba kandidatu balun tuir hela misa no balun tanba loron ohin ne’e loron nasionál veteranu nian, enatun sira tenke muda sira-nia kalendáriu ba loron seluk.

“Ha’u hanoin kandidatu sei realiza fali ba fatin seluk bainhira sira altera kalendáriu tanba ho razaun ne’e mak forte katak misa tanba nu’udar ema kristaun ida tenke tuir misa no kandidatu ne’e nia kalendariu mak sei menus,” nia hateten.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here