VIQUEQUE, 03 marsu 2022 (TATOLI)–Diretór Komisaun Nasionál Eleisaun (CNE, sigla portugés) Viqueque, Honoriu Cruz da Silva, informa, bazeia ba observasaun, kampaña Kandidatu Prezidente Repúblika (PR) períodu 2022-2027, Tenente Jenerál Reformadu, Lere Anan Timur, iha munisípiu Viqueque la’o ho situasaun hakmatek.
“Bazeia ba ami-nia observasaun ba atividade kampaña númeru sorteiu 08, ein jerál atividade la’o ho hakmatek no la kontra prosedimentu eletorál kampaña nian,” Diretór CNE munisipál hateten ba Agência TATOLI, hafoin ramata observa kampaña iha kampu futeból Viqueque, kinta ne’e.
Notísia relevante: Lere tau prioridade haloot restu mortál iha fatin dignu
Nune’e, Diretór CNE husu ba Kandatu PR atu nafatin kumpre prosendimentu kampaña no promove páz iha prosesu kampaña eleitorál.
Aleinde ne’e, nota mós katak iha simpatizante balun mak la’o bá mai ho motorizada, ne’ebé parte CNE komunika ona ba ekipa susesu sira atu nafatin kumpre regra no prinsípiu kampaña.
Nune’e mós, observa mensajen Kandidatu PR Lere Anan Timur, iha ninia diskursu ko’alia liu ba kompeténsia Prezidenti Repúblika nian.
“Ha’u hanoin hosi mensajen sira ne’e bele asegura establidade, unidade nasionál no harii justisa paz, tanba mensajen furak ba ita-nia komunidade,” nia akresenta.
Jornalista : Vitorino Lopes da Costa
Editora : Julia Chatarina