Kandidatu Prezidente Repúblika períodu 2022-2027, Maria Ángela Freitas da Silva, halo kampaña ho tipu diálogu no fahe brosura iha suku Buruma, kinta (03/03). Imajen TATOLI/Jogerjo Guterres

BAUCAU, 03 marsu 2022 (TATOLI)–Kandidatu Prezidente Repúblika (PR) períodu 2022-2027 ho númeru sorteiu 03, Maria Ángela Freitas da Silva, kinta ne’e, halo kampaña ho tipu diálogu no fahe brosura iha suku Buruma, postu administrativu Baucau villa, munisípiu Baucau, hahú tuku 10:00 to’o 12:00.

Durante kampaña, kandidatu independente ne’e kompromete tau importánsia iha setór produtivu sira hodi lori povu ba moris di’ak.

“Haree ba área produtivu sira, presiza iha indústria atubele konserva produsaun, tanba durante ne’e haree katak ai-han sira ne’ebé prodús iha rai-laran seidauk konsege instala fábrika ida atu  bele absorve serbisu ba joven sira. Ida-ne’e maka sai prioridade tebes ba ha’u atubele fó atensaun hodi koopera ho Governu ninia programa sira. Aleinde ne’e, haree liu oinsá bele iha fábrika iha kada munisípiu tuir potensialidade ne’ebé iha,” Ángela Freitas hateten iha ámbitu kampaña, iha suku Buruma.

Notísia relevante: Kandidatu PR Ângela Freitas kansela kampaña loron dahuluk iha Lautém

Ambiente kampaña ho tipu diálogu no fahe brosura, Kandidatu PR Maria Ángela Freitas da Silva, iha suku Buruma, kinta (03/03). Imajen TATOLI/Jogerjo Guterres

Aleinde ne’e, nia prioritiza mós bem estar no alimentasaun, tanba nota katak ohin loron sidadaun barak mak sofre má nutrisaun.

“Kondisaun má nutrisaun tanba ita konsome ai-han sira ne’ebé la saudável, tanba ne’e maka presiza haree ba mudansa atubele fó atensaun hodi prodús ai-han nutritivu hodi fornese ba sidadaun hodi hadi’a kresimentu família,” nia akresenta.

Haree mós katak munisípiu Baucau nu’udar munisípiu ne’ebé iha área potensialidade a’as tebes.

“Baucau potensiál tebes, tanba ne’e iha ha’u-nia polítika, Baucau sei sei instala Aeroportu Internasionál ida di’ak. Tanba ko’alia kona-ba bem estar ne’e ba povu ein jerál, klaru katak tenki fó atensaun ba sidadaun sira no tenki proteje direitu sidadaun ne’ebé konsagra iha Konstituisaun, ne’ebé haree katak direitu ekonomia, sosiál no kulturál,” nia dehan.

Biban ne’e, Kandidatu PR ne’e introdús mós ninia misaun no vizaun ba apoiante sira, ne’ebé misaun maka atu serbisu hamutuk kaer metin soberania nasaun, reunifika unidade nasionál, moris ho dignidade no prospriedade.

Enkuantu, nia misaun mak hametin soberania no Estadu ne’ebé forte no hametin ekonomia nasaun, hametin Estadu direitu demokrátiku, inklui hadi’a ekonomia povu ein jerál.

Apoiante Kandidatu PR Maria Ángela Freitas da Silva, Apolinário da Silva Morreira. Imajen TATOLI/Jogerjo Guterres

Iha biban hanesan, Apoiante, Apolinário da Silva Morreira, apresia ho programa Kandidatu PR Ángela Freitas no iha esperansa bainhira kandidatu ne’e eleita sai Prezidente Repúblika, bele realiza planu sira hodi solusiona problema povu nian.

“Nu’udar joven ida, hakarak husu de’it ba Kandidatu Ángela katak bainhira eleita duni, bele tau prioridade ba ami-joven sira liuhosi programa ne’ebé planeia ona,” nia dehan.

Durante diálogu ne’e laiha seguransa hosi Polísia Nasionál Timor-Leste (PNTL), observadór nasionál no internasionál, inklui supervizaun hosi Komisaun Nasionál Eleisaun (CNE, sigla portugés).

Tuir ajenda Kandidatu PR ho númeru sorteiu 03, iha kinta ne’e, halo kampaña ho tipu diálogu no fahe brosura realiza iha Gor Kota Baru, maibé ekipa susesu sira deside kansela fatin ne’e no muda ba fali suku Buruma, munisípiu Baucau.

Iha loron tuir mai, sei kontinua kampaña iha postu administrativu Ossu, munisípiu Viqueque, ho tipu kampaña hanesan, hosi tuku 10:00 dadeer to’o lorokraik tuku 16:00.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here