Abertura kampaña eleisaun presidensiál ba kandidata Xefe Estadu, Armanda Berta, iha Ainaro. Imajen Tatoli/Anito Soares.

AINARO, 02 marsu 2022 (TATOLI) – Armanda Berta, kandidata ba Xefe Estadu períodu 2022-2027 husi Partidu Kmanek Haburas Unidade Nasionál Timor-Oan (KHUNTO) hakarak promove paz no luta ba povu nia moris di’ak bainhira fó fi’ar sai Prezidente Repúblika (PR).

“Se ha’u sai Prezidente Repúblika sei hametin paz, lori prosperidade ba povu. Ha’u hanoin laiha dame, laiha dezenvolvimentu. Karik fó fi’ar mak ha’u sei luta ba imi hotu nia moris di’ak”, dehan iha abertura kampaña eleisaun presidensiál, iha kampu futeból, Ainaro.

Kandidata ne’e salienta katak nia parte sei haktuir konstituisaun RDTL, promove unidade no estabilidade no polítika nasionál ne’ebé sai determinante ba dezenvolvimentu rai ida ne’e.

Nia sei koopera ho Governu atu haree ba Timor-Leste nia ekonomia hodi lalika dependénsia liu ba fundu petrolíferu.

“Husu ba membru Ezekutivu sira atu iha polítika ne’ebé di’ak hodi jere rekursu naturál, liuliu fatin turístiku sira no produtu oioin hodi bele fó retornu ba povu Timor-Leste”.

“Bainhira imi fó fiar mai há’u, sei hametin seguransa interna no esterna liuhusi insititusaun Estadu hanesan PNTL no F-FDTL iha oras 24 sein ta’uk no ameasa husi kualkér ema.  Sei dezenvolve área defeza no seguransa, liuliu nesesidade no preokupasaun [forsa sira-nian] atubele defende povu no rai ida ne’e. Fortalese mós kooperasaun ho nasaun sira seluk”, afirma.

Armanda Berta promete sei promove igualdade atu garante povu hotu hetan tratamentu hanesan, la intervein órgaun sira seluk nia knaar no kria diálogu nasionál.

“Ha’u sei kontribui ba povu no serbí nasaun ida ne’e. Presiza neon no laran-moos ba povu. Nu’udar inan ida ha’u prontu atu sai matadalan ba imi, rona imi-nian halerik, defende imi-nian direitu. Sei toma nota ba preokupasaun hotu, nu’udar buka’e ida ba ha’u atu tulun imi iha ha’u-nian mandatu”, tenik.

Armanda Berta iha nia kampaña agradese ba apoiante sira ba nia kandidatura Prezidente Repúblika.

Iha fatin hanesan, Sekretáriu-Jerál Partidu KHUNTO, José Agustinho da Silva, dehan  ema ko’alia buat oioin ba forsa polítika ne’e, maibé ho fiar malu sei lori partidu bá oin.

“To’o ona tempu atu ema mak sujeita ba dezenvolvimentu. Nune’e, husu atu tau kofiansa ba kandidata Prezidente Repúblika ho numeru sorteiu 9”.

Nune’e mós konselleiru KHUNTO, José ‘Naimori’ Bucar, relasa katak kandidata Armanda Berta sei kria paz, hametin estabilidade, lori povu ba moris di’ak no hakarak mak unidade nasionál, la hanoin ba grupu no ninia partidu rasik.

Konselleiru ne’e husu ba militante no simpatizante sira atu kumpre regra husi órgaun eleitorál hodi fó susesu ba Armanda Berta ninia kandidatura.

Marito Magno, Prezidente ekipa ba kandidatu Armanda Berta, husu apoiante sira atu kumpri regra Komisaun Nasionál Eleisaun (CNE) no ba inan-aman atu bandu labarik sira partisipa iha atividade ne’e.

Iha kampaña eleitorál refere hetan supervizaun husi observadór internasionál, nasionál no CNE.

Iha komísiu ne’e kumpre regra hodi termina atividade ne’ebé hala’o iha tuku 14h00 to’o 18h00.

Jornalista: Domingos Piedade Freitas

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here