Kandidatu Prezidente Repúblika períodu 2022-2027 ho númeru sorteiu 15, Felisberto Araújo Duarte, realiza kampaña loron daruak ho tipu fahe pamfletu iha suku Kuluhun. Imajen Tatoli/Nelson de Sousa.

DILI, 03 marsu 2022 (TATOLI)—Kandidatu Prezidente Repúblika ba períodu 2022-2027 ho númeru sorteiu 15, Felisberto Araújo Duarte, kinta ne’e realiza kampaña ba loron daruak ho tipu fahe pamfletu iha suku Kuluhun, postu administrativu Cristo Rei, munisípiu Dili.

Kandidatu independente ne’e hateten, bainhira eleitu sai Prezidente Repúblika nia parte sei estabelese programa kréditu eskola ba timor-oan hotu iha direitu hetan kréditu, atu kontinua sira-nia eskola hahú hosi primáriu to’o universidade no hakarak kontinua hasai mestradu ba eskola iha rai-laran no estranjeiru.

Estadu selu kustu propina no sei fó tan osan naton ba nesidade alimentár, selu uma kost, internet, telemovel, transporte ho livru kada fulan no bainhira eskola hotu no servisu ona mak sira foin bele selu fali.

“Governu iha obrigasaun tenke buka servisu ba sira atu garante, sira bele selu fali kréditu refere no timor-oan seluk mós bele nafatin hetan kréditu hodi ba kontinua eskola. Tan ne’e hanesan fó fiar mai ha’u eleitu mak sei ko’alia ho Governu hodi kria programa ne’e,” Kanditadu independente, Felizberto Araújo Duarte, hateten durante kampaña ho tipu fahe pamfletu perante ba simpatizante sira.

Tanba, nia dehan, Prezidente Repúblika iha knar ida mós oinsá ko’alia ho órgaun ezekutivu hodi fó atensaun ba programa hirak ne’e hodi benefisía duni ba povu tomak.

Aleinde ne’e, nia priotiza programa reforma ekonómika mak sei estabelese presu mínimu ba produtu nasionál ne’ebé iha ponténsia ba exportasaun hanesan kafé, tanba tinan 20 ona seidauk define presu entaun prezúdika agrikultór sira.

Nia sei servisu hamutuk ho Governu no misaun diplomátika Timor-Leste nian iha estranjeiru hodi lori nafatin investidór estranjeiru sira atu bele kria empregu iha rai-laran.

Sei estabelese kuoata ka hapara importasaun ba produtu sira-ne’ebé TL prodús ona hanesan importasaun manu no produtu agrikola seluk.

Estabelese lei atu obriga Governu selu multa bainhira halo pagamentu tarde ba emprezáriu sira ne’ebé ezekuta projeitu ka atividade ruma kontrata ho Governu.

Apoiante Kandidatu Prezidente Repúblika períodu 2022-2027 ho númeru sorteiu 15, Felisberto Araújo Duarte, iha suku Kuluhun rona hela kandidatu nia programa no kompromisu. Imajen Tatoli/Nelson de Sousa.

Karik eleitu sai Xefe Estadu, nia sei harii banku dezenvolvimentu nasionál atu nune’e projetu hotu Governu nian timor-oan sira bele kaer no mós halo investimentu ne’ebé boot iha área oioin, no estabelese lei konkorénsia hodi evita ekónomia Timor-Leste mesak ema ida ka rua de’it mak kontrola hotu hanesan setór agrikultura.

Harii sentru ba matenek-na’in sira atu akumula ekonomista estudu kustu no benefísiu ba programa no lejizlasaun sira hosi Governu atu asegura katak desizaun hotu tenke fó benefísiu ba povu, hapara programa no desizaun arbiru la halo uluk estudu kursu no benefísiu hosi ekonomista sira atu bele asegura benefísiu boot ba públiku

Kandidatu ne’e aprezenta mós programa prioridade reforma justisa mak autór judisiáriu hanesan ba vaga atu sai juis, prokuradór no instituisaun justisa seluk hanesan inspetór jerál no PDHJ mak labele mete polítika durante tinan lima ka 10 antes hafoin bele aplika.

“Tanba ne’e presiza iha lei ida hodi asegura katak autór justisa sira foti desizaun labele bazea ba interese polítika. No reforma lei ligadu ho estudu funsaun públika hodi revoga ka hasai artigu ne’ebé permite hasai funsionáriu públiku hosi sira-nia kargu bazea ba polítika,” nia dehan.

Bainhira eleitu sai Xefe Estadu mak nu’udar Prezidente Repúblika sei kumpre de’it knar tuir konstituisaun RDTL.

Enkuantu tuir kalendáriu STAE nian, kampaña ba kandidatu Felisberto Araújo kinta ne’e hala’o iha Dili hahú iha tuku 08h00 to’o 17h00 ho tipu fahe pamfletu maibé hala’o fali iha tuku 16h00 to’o 17h00 lorokraik.

Iha atividade kampaña ne’e hetan supervizaun hosi Komisaun Nasionál Eleisaun (CNE, siglá portugés), observadór interasionál, observadór Provedória Direitu Umanu no Justisa (PDHJ) no hetan seguransa másimu hosi Polísia Nasionál Timor-Leste.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here