Kandidatu Prezidente Repúblika, Francisco Guteres 'Lu Olo', abertura kampaña eleitorál iha Palaban, Oé-Cusse. Imajen mídia kandidadu PR.

OÉ-CUSSE, 02 marsu 2022 (TATOLI) – Kandidatu Prezidente Repúblika, Francisco Guterres ‘Lu Olo’, akompaña hosi Sekretáriu Jerál Partidu FRETILIN, Mari Alkatiri, tersa ne’e halo abertura kampaña eleitorál iha suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Iha kampaña eleitorál kandidatu ne’e promete halakon korrupsaun no dignifika estatuta rejiaun refere.

Molok komísiu ba militante sira, lia-na’in mai hosi suku 18 simu kandidatu ne’e ho kultura Oé-Cusse nian, ho dadolin hodi husu matak malirin ba bei-ala sira atu realiza atividade kampaña ne’e la’o ho pás no estabilidade.

Durante tinan lima asume Xefe Estadu hasoru situasaun difisil tanba kazu mundiál COVID-19, nu’udar sasukat konsege ultrasapasa dezafiu boot ne’e hodi hamutuk nafatin ho povu.

Nune’e kandidatu ho númeru sorteiu 6 ne’e promete, bainhira eleitu ba Prezidente Repúblika, sei hametin pás no estabilidade, halakon diskriminasaun, halakon korrupsaun, hadi’a instituisaun judisiáriu-sira no espesiál liu maka dignifika estatuta Rejiaun Administrativa Espesiál Oé-Cusse Ambeno (RAEOA).

“Bainhira ha’u eleitu dala-ida tán, ha’u sei garante pás no estabilidade ba rai ho povu tomak, primeiru ha’u sei tau Oé-Cusse nian tuir nia estatutu rasik, hodi trata RAEOA hanesan atoni-oan duni, karik ho orsamentu ne’ebé aprova ba Oé-Cusse-nian atu hadi’a povu Oé-Cusse nia moris,” Lu-Olo, ko’alia iha nia kampaña eleitorál iha Palaban, Oé-Cusse.

Nune’e mós bainhira eleitu dala-ida tán ba períodu 2022-2027, sei kumpri tuir konstituisaun, halakon korupsaun ne’ebé buras iha Timor-Leste.

“Ha’u-nia kompromisu seluk maka tenke hametin justisa iha ita-nia rai, hametin órgaun jurisiáriu tribunal-sira, atubele julga kazu sira-ne’ebé iha konflitu interese, tanba to’o ohin loron Timor-Leste uza nafatin lei UNTAET nian, hodi kria ita-nia judisiáriu, tán ne’e ita tenke hadi’a hosi tribunál primeira instánsia, distritál to’o Tribunál Rekursu,” nia katak.

Iha fulan hirak liubá, Prezidente Repúblika promulga lei organizasaun judisiáriu, ne’e atu harii fila-fali sistema judisiáriu tribunál sira, atu kompleta tribunál-sira iha munisípiu, tribunál rekursu no sei kria tán supremu tribunál aas-liu, nune’e permite sidadun-sira asesu ba justisa.

“Hamutuk ho ha’u ita la’o ba oin, hamutuk ho ha’u hadi’a ita-nia rai, no hamutuk ho ha’u ita kombate korrupsaun ne’ebé maka buras iha ita-nia rai, ida ne’e moras aat mak moris iha Timor-Leste, hodi fó kiak ba povu kiik-sira,” Lú Olo hateten.

Sekretáriu Jerál Partidu FRETILIN, Mari Alkatiri, reforsa, Lu-Olo nu’udar kandidatu únika hosi Komité Sentrál FRETILIN (CCF, sigla portugés), nune’e nia apela ba militante no apoiante sira iha Oé-Cusse, atu hili Lú Olo hodi hatutan H6 iha Estadu Timor-Leste.

Sekretáriu Jerál Partidu FRETILIN, Mari Alkatiri. Imajen kandidatu mídia PR.

“Iha festa demokrasia ne’e imporante tebes atu haree, iha kandidatu ida mai ho nia bandeira no partidu rasik, nia hatudu ona katak iha nia mandatu tinan lima nu’udar Xefe Estadu, laiha krize. Nia hatudu ona katak nia koneñe konstituisaun no lei-sira, tán ne’e politíka H6, laiha ema ida kontra durante nia mandatu,” Alkatiri tenik.

Tuir observasaun Agência TATOLI iha komísiu ne’e hetan seguransa másima hosi PNTL, observadór internasionál sira hosi Uniaun Europeia (UE) no Komisaun Nasionál Eleisaun (CNE, sigla portugés).

Nune’e mós Sekretariadu Tékniku Administrasaun Eleitorál (STAE) no Provedoria Direitu Humanu no Justisa (PDHJ). Iha kampaña eleitorál ne’e partisipa hosi militante no apoiante kuaze rihun hitu resin.

Jornalista     : Abílio Elo Nini
Editór             : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here