Uma iha Viqueque ne’ebé hetan estragu tanba dezastre naturál. Imajen/Espesiál

VIQUEQUE, 01 marsu 2022 (TATOLI)–Koordenadór Protesaun Sivil munisípiu Viqueque, Cirilio Soares Gomes, informa, hosi fulan-janeiru to’o fevereiru 2022, rejista vitíma dezastre naturál hamutuk uma-kain 29.

“Vitíma sira-ne’e afetadu hosi anin no udan, ne’ebé estraga sira-uma ho grau a’at kama’an no a’at totál,” Koordenadór Protesaun Sivil hateten ba Agência TATOLI, iha munisípiu Viqueque, tersa ne’e.

Antes ne’e, vítima sira hetan ona apoiu emerjénsia hanesan nesesidade bázika, enkuantu materiál konstrusaun mak sei prosesa iha nasionál.

“Medida apoiu emerjénsia  ne’ebé fó ba vítima dezastre naturál sira maka hanesan foos, mina han, dose, supermi, sanan, tasu no seluk tan,” nia akresenta.

Notísia relevante: Ema 14 lakon vida durante dezastre naturál iha janeiru-fevereiru 2022

Daudaun ne’e Protesaun Sivil haruka ona dokumentu vitíma sira ba nasionál hodi fó apoiu materiál konstrusaun hodi hadi’a uma ne’ebé hetan estragu.

“Bainhira prosesa materiál rekuperasaun ba konstrusaun, ami sei haruka dokumentu ba  nasionál, hafoin nasionál haruka  materiál  mai munisípiu maka ami distribui ba vítima sira hodi konstrui filafali sira-nia uma ne’ebé hetan estragu,” nia tenik.

Hosi dadus vitíma dezastre naturál hamutuk 29 iha postu Ossu, Uatucarbau no Uatulari, kompostu hosi uma a’at totál hamutuk 15 no a’at kama’an hamutuk 14.

“Afetadu ba dezastre naturál ne’e sei iha, maibé ami seidauk halo verifikasaun tanba ami falta transporte, daudaun ami iha motorizada ida de’it. Tanba ne’e, ami seidauk tun ba terrenu fali,” nia dehan.

Iha uma-kain balun iha postu Uatulari ruma maka Protesaun Sivil seidauk ba halo verifikasaun, maski simu ona kontaktu hosi komunidade.

Jornalista : Vitorino Lopes da Costa

Editora    : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here