Koordenadór HIV/AIDS munisípiu Bobonaro, Sidonio Gonçalves. Imajen Tatoli/Sergio da Cruz.

BOBONARO, 24 fevereiru 2022 (TATOLI) – Koordenadór HIV/AIDS munisípiu Bobonaro, Sidonio Gonçalves, fó-sai katak, pasiente Human Immunodeficiency Virus/Aquired Immune Deficiency Syndrome (HIV/AIDS) na’in-20 iha munisípiu ne’e halai lakon hosi tratamentu saúde.

Dadus ne’ebé parte saúde munisípiu Bobonaro rekolla dezde tinan 2009 mai to’o agora totál kazu detetadu 106. Hosi númeru ne’e na’in-43 mak ativu hela tratamentu no na’in-32 husik ona mundu.

Enkuantu kazu hirak-ne’e mai hosi postu administrativu Bobonaro, Atabae, Lolotoe, maibé barak liu hosi postu administrativu Maliana no Balibo.

“Maluk sira-ne’ebé ita deteta pozitivu ikus lakohi koopera, ne’ebé ita konsidera lakon kontaktu ka lakohi kontinua halo tratamentu na’in-20. Tuir informasaun ne’ebé ita hetan, balun halai ona ba Indonézia no balun sei movimentu hela iha ita-nia munisípiu no territóriu laran,” nia informa ba Agência Tatoli, iha knaar-fatin, Soso, Maliana kinta ne’e.

Koordenadór ne’e fó-sai katak, durante ne’e pasiente sira halo teste no identifika nu’udar Timor-oan maibé hafoin deteta rezultadu pozitivu sira lakon kedas kontaktu.

Tanba ne’e ba oin maneira atu halo teste ba pasiente sira, ekipa sira sei rejista uluk pasiente ne’e ninia identidade orijinál no hela-fatin permanente, nune’e evita lakon konaktu.

Durante ne’e parte saúde tenta esforsu hodi serbisu hamutuk ho parseiru Estrela+ ba halo akonsellamentu konsege pasiente balun halo fali tratamentu ativu iha Hospital Referál Maliana (HRM) maibé balun nafatin lakohi koopera.

Ho nune’e iha posiblidade sei fó risku boot bele transmite virus ne’e ba ema seluk tanba moras ne’e barak mak la hatudu ninia sintoma iha isin-lolon.

“Ami husu de’it ba pasiente sira-ne’e nia konsiénsia atu mai fali halo tratamentu, maibé ami mós ho parseiru relevante sira-ne’ebé serbisu hamutuk durante ne’e sei esforu fahe informasaun ba komunidade sira atu hakbesik-aan mai iha fasilidade saúde atubele koko de’it ita-nia raan, atubele hatene ita-nia estatutu katak ha’u livre hosi HIV/AIDS ka lae, sé pozitivu ita halo kedas tratamentu,” nia esplika.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here