Paktu eleisaun pasífiku no seremónia kulturál iha Viqueque, kinta (24/02). Imajen TATOLI/Vitorino Lopes da Costa

VIQUEQUE, 24 fevereiru 2022 (TATOLI)—Komisaun Nasionál Eleisaun (CNE, sigla portugés) Viqueque akompaña ho lia-na’in sira, kinta ne’e, realiza paktu eleisaun pasifíka ba Eleisaun Prezidensiál no seremónia kulturál, hodi husu matak malirin ba matebian no rai lulik.

Programa ne’e ho tema ‘Ho kultura ita promove pás no unidade iha Eleisaun Prezidente 2022’, ne’ebé mai ho objetivu atu lia-na’in sira tula liman ba kandidatu Prezidente Repúblika no fó matak malirin iha ámbitu kampaña no eleisaun.

“Ohin ita hamutuk realiza seremónia ne’e hodi lia-na’in sira tula liman ba kandidatu Prezidente Repúblika hotu,” Komisáriu CNE destakadu munisípiu Viqueque, Olávio da Costa Monteiro Almeida, hateten iha salaun munisípiu Viqueque, kinta ne’e.

Notísia relevante: CNE Viqueque fó teste ba kandidatu ofisiál supervizaun eleitorál na’in-310

Nune’e, Komisáriu konsidera seremónia kulturál ne’e importante tebes tanba sai kustume Timor-Leste desde beila sira-nia tempu to’o oin loron.

“Ita kaer nafatin kultura, natureza no tane eroi sira ne’ebé mate iha funu libertasaun nasionál,” nia akresenta.

Iha ámbitu ne’e, lia-na’in hosi munisípiu Viqueque, oferese bua no malus ba reprezentante kandidatu Prezidente Repúblika na’in-16, ne’ebé partisipa de’it hosi reprezentante kandidatu na’in-hitu, maski antes ne’e parte CNE halo ona koordenasaun ho reprezentante sira.

Ho nune’e, seremónia iha parte ponte leste ohin termina iha munisípiu Viqueque.

Nune’e mós, reprezentate lia-na’in munisípiu Viqueque, Carlos Martins, hateten, liuhosi seremónia ne’e, beila no foho lulik sira haraik matak malirin liuhosi bua no malus hodi fó matak malirin ba kandidatu Prezidente Repúlika ba períodu 2022-2027.

Seremónia ne’e partisipa hosi autoridade lokál, diretór liña ministérial sira iha munisípiu Viqueque no reprezentante partidu polítiku sira.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here