Prezidente CNE, José Agostinho da Costa Belo. Imajen Tatoli /Egas Cristovão.

BAUCAU, 23 fevereiru 2022 (TATOLI) – Komisaun Nasionál Eleisaun (CNE, sigla portugés) laiha intensaun atu teste kandidatura Rrezidente Repúblika liuhosi debate ho lian portugés.

Prezidente CNE, José Belo, rejeita ho informasaun ne’ebé lansa iha rede sosiál katak uza lian portugés hanesan teste kandidatura ka atu hatún kandidatura sira.

“Saida mak ami halo laiha intensaun ruma, la halo teste ba ita-nia maluk sira, só promove de’it lian portugés no tetun hanesan lian ofisiál Timor-Leste nian,” Prezidente CNE hateten iha salaun apuramentu administrasaun Vila Nova, Baucau, kuarta ne’e.

José Belo esplika, CNE foti desizaun uza lian portugés bazea ba Konstitusaun Republika Demokratika Timor-Leste (KRDTL) artigu 77 kona-ba kandidatura Prezidente Repúblika tenke iha kapasidade natoon atu lidera nasaun.

Alende ne’e, opiiaun uza lian portugés ho intensaun atu promove lian ofisiál nune’e bainhira debate kandidatura sira resposta pergunta tuir kapasidade idak-idak nian no rezultadu hodi debate iha eleitór sira.

“Balun krítika hanoin dehan uza portugés hotu, pergunta lima karik, protugés ida deit ba ita-nia kandidatura sira. Sira bele resposta tuir kapasidade ne’ebé sira iha,” José Belo esplika.

CNE mós nafatin simu no rona sujestaun liuhosi ko’alia ba malu atu rezolve preokupasaun saida de’it mak kandidatura sira hasoru no hakarak atu hato’o hodi buka solusaun.

Entretante, tuir planu CNE sei realiza debate entre kandidatura prezidente republika na’in-16 iha loron 15 marsu.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here