Irrigasaun iha suku Luka liga ba natar Wedare. Imajen/Espesiál

VIQUEQUE, 22 fevereiru  2022 (TATOLI)–Diretór Servisu Ministériu Agrikultura no Peska (MAP) munisípiu Viqueque, Carlos Pinto, husu Governu sentrál atu hadi’a sistema irrigasaun hodi hasa’e produsaun rai-laran.

“Ita haree munisípiu Viqueque iha natar ektare 90 resin, maibé produsaun iha ektare 40 resin maka funsiona iha postu Uatucarbau no Uatulari. Entaun ita haree kada tinan prodús tonelada rua resin. Tanba ne’e haree ba produsaun tun liu. Presiza hadi’a sistema irrigasaun hodi hasa’e produsaun no redús importasaun,” Diretór Servisu MAP munisípiu Viqueque, Carlos Pinto, hateten ba Agência TATOLI, iha ninia knaar fatin, Beloi, tersa ne’e.

Notísia relevante: Reabilitasaun irrigasaun Wedare Viqueque paradu difikulta agrikultór hala’o atividade

Iha Viqueque, iha kada uma-kain ne’ebé envolve iha área agrikultura, ema sira ne’ebé serbisu hanesan agrikultór ho idade 40 ba leten, enkuantu joven sira ladún partisipa iha atividade ne’e.

Tuir dadus demografia munisípiu  Viqueque, iha populasaun hamutuk 58.612 maka envolve iha setór agrikultór.

“Produsaun hare iha postu Uatucarbau no Uatulari hamutuk tonelada ualu iha tinan 2021. Entaun ita-nia konsumu liu fali produsaun, ho ida-ne’e la to’o kobre ita-nia nesesidade,” nia akresenta.

Natar iha postu Uatucarbau, parte Baibudu no Komo-oli hamutuk ektare 7.000, maibé ektare 300 maka funsiona, enkuantu ektare 400 abandonadu. Iha postu Uatulari iha parte Bebui iha ektare 1.100 maka produtivu.

“Ha’u haree abandona tanba sistema irrigasaun ladi’ak, hanesan iha parte Baidubu, mota sobu irrigasaun beibeik. Nune’e komunidade hato’o ona pedidu eskavatór mai MAP Viqueque,” Diretór ne’e relata.

Tuir Diretór Servisu munisipál ne’e, presiza fó sensibilizasaun ba povu agrikultór hodi hasa’e produsaun.

“Atu hasa’e produsaun, presiza tau orsamentu hadi’a irrigasaun, maibé kada tinan ami propoin orsamentu la pasa. Parte Autoridade munisípiu Viqueque presiza tau prioridade ba setór agrikultór hodi hasa’e produsaun,”  n ia sujere.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here