Imajen: pájina STAE

COVALIMA, 21 Fevreiru 2022 (TATOLI) – Sekretáriadu Tékniku Administrasaun Eleitorál (STAE), Munisípiu Covalima, fó formasaun ba brigada sira na’in 80 hodi prepara ba Eleisaun Prezidensiál (ElPres) ne´ebé sei akontese iha 19 marsu 2022.

“Ohin loron ita hamutuk iha ne’e, ita atu fó formasaun ba brigada sira no husu ba Brigada sira atu foku ba matéria ne’ebé mak aprezenta hosi ita-nia formadór sira hodi bele aplika iha tereñu“, Diretór STAE Covalima, Francisco Gusmão, hateten ba Tatoli, iha salaun STAE, Kampung-Baru Segunda  ne’e.

Tuir Gusmão, objetivu hosi formasaun ne’e atu haklean  koñesementu no hasa’e abilidade Brigada sira ni’an, nune’e sira-bele ezerse sira nia funsaun ho di’ak, atu organiza no asegura materiál eleisaun nian iha sentru votasaun sira.

Gusmão subliña, formasaun ne’e  hala’o  durante loron tolu, ne’ebé  sei fahe matéria sira hanesan edukasaun votante, priénse akta, lei eleisaun no papel média.

“Formasaun ne’e hanesan bukae ba Brigada sira. Husu atu hothotu tenke iha konsentrasaun nune´e bele hetan matéria hosi formador sira“, nia dehan.

Diretór Komisaun Nasionál Eleisaun (CNE-Sigla Portugés) hosi Munisípu Covalima, Hermengildo de Sena, hateten prezensa órgaun eleitorál atu superviziona servisu STAE nian.

“Aproveita oportunidade ida ne´e,  ha’u husu ita-boot sira bainhira mosu fallansu iha tereñu tenke koordena, ita-bele armonia fallansu sira. Tanba servisu CNE-STAE iha períodu eleisaun ne’e sensitivu, ita bo’ot sira tenke aproveita formasaun ne´e didiak“ katak.

Administradór Munisípiu Covalima, Francisco de Andrade, lembra katak eleisaun realiza tinan lima dala-ida tanba ne’e molok realiza eleisaun sempre fó formasaun nune´e bele hasa’e kuñesementu brigada sira nian.

“Ha’u husu ba Brigada sira atu ativa tanba ita-boot sira mak liman-ain hosi STAE iha tereñu, nu’udar ema independente tenke onestu no imparsiál ba buat hotu, ita-boot sira mak hatene, tanba ne´e, labele tau intrese grupu ka partidu sira iha prosesu eleisaun. Oinsa prosesu eleisaun atu la´o ho di’ak tenke kria unidade  no pás”, dehan.

Enkuantu, sentru votasaun iha Munisípiu Covalima hamutuk 80, estasaun votasaun 92 ho nia eleitór ne’ebé atu vota hamutuk 47,807.

Jornalista : Celestina Teles

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here