Manán Kamboja 1-0, FFTL louva jogadór no treinadór Timor-Leste

DILI, 20 fevereiru 2022 (TATOLI)– Sekretáriu Jerál Interinu Federasaun Futeból Timor-Leste (FFTL), Frederico Martins, hateten la fasil Timor-Leste atu hakat to’o semi-finál AFF CUP U-23 tinan ne’e, maibé o esforsu ekipa Lafaek konsege okupa lista semi finál, nune’e louva no apresia ida ba jogadór no treinadór ekipa Timor-Leste.

“Ida ne’e mak tarjetu ita nian fó ba, Fabio Maciel bainhira iha hanaruk nia kontratu ita dehan kedan tenke lori selesaun nasionál U-23 tama to’o semi-final AFF Cup U-23, se la to’o mak sei hapara nia, maibé konsege to’o duni ona ita louva no apresia sira hotu nia esforsu, dala ida tan parabéns,” Sekjer Frederico, hateten  ba Agência TATOLI iha edifisiu FFTL Dili, segunda ne’e.

Notísia relevante: Jogu AFF Cup U-23, Ekipa Timor-Leste empate ho Filipina 2-2

Tanba SekJer ne’e harere foin dalahuluk iha ekipa Timor-Leste nia istoria hahú hosi tinan 2000 to’o ohin loron iha jogu AFF CUP Timor-Leste utrapasa ba semi-finál.

Ho jogu ne’ebé selesaun nasional sira hatudu ona di’ak tebes no ekipa ne’e mak sei prepara masimu hodi ba kompete iha Sea Games Vietname maiu mai ne’e.

“Sira joga kapas tebes, ekipa ida ne’e mak ita sei lori ba kompete tan iha Sea Games Vietname, hanoin iha Sea Games ita sei halo buat ruma iha ne’ebá,” nia dehan.

Daudaun ne’e iha jogu AFF Timor-Leste mak lidera ho pontu hitu, enkuantu Kamboja ho pontu neen, Filipina pontu ida no Brunei Darusalam mamuk ka zero.

Iha sorin seluk, Treinadór Selesaun Nasional U-23, Fabio Maciel sente kontente tebes ho rezultadu ne’e tanba konsege manán ona Kamboja hodi hakat ba semi-finál.

“Ha’u sente kontente tebes tanba ita bele hakat tan pasu ida ba semi-finál, ha’u ko’alia ona ho jogadór sira iha jogu semi-finál tenke hakaas-an atu ita bele manán, maske ekipa Thailandia no Vietname ne’e ekipa forte,” Fabio dehan .

Nia dehan Timor-Leste agora tama ona ba lista ekipa forte la’ós hanesan ekipa sira tinan kotuk liubá.

“Ita agora ekipa forte, tanba ekipa hotu agora respeita ita nia ekipa, tanba ekipa ida ne’ebé joga ona ho di’ak iha jogu AFF ne’e,” nia relata.

Nia hatutan, tekniku ne’ebé fó ba jogadór sira aprende ho di’ak nune’e mak fó ona vitória ba Timor-Leste nune’e nia husu ba jogadór sira atu mantein nafatin pozisaun ne’ebé iha atu manán jogu tuir mai.

Daudaun Timor-Leste mak lidera grupu A ho pontu hitu, enkuantu Kamboja ho pontu neen.

Iha jogu primeiru Timor -Leste empate ho Filipina 2-2, iha jogu segundu Timor-Leste mantein iha nia pozisaun hodi manán Brunei Darusalam 3-1 no jogu ikus hasoru Kamboja manán 1-0.

Tanba ne’e, ekipa Timor-Leste daudaun prepara an hodi ba kompete ho nasaun zigante sira seluk iha semi final hanesan Vietname no Thailandia ne’ebe  hala’o jogu ikus se mak manán Timor -Leste sei kontra nian. 

Notísia relevante: Halakon Kamboja, TL hakat ba semifinál AFF

Jornalista: Hortencio Sanchez

Editór      : Florencio Miranda Ximenes