Diretór STAE Covalima, Francisco Gusmão. Imajen TATOLI/Celestina Teles

COVALIMA, 21 fevereiru 2022 (TATOLI) – Diretór Sekretariadu Tékniku Administrasaun Eleitorál (STAE), Francisco Gusmão, hateten Órgaun Eleitorál identifika sentru votasaun 22 ne´ebé la asesu enerjia elétrika no 12 iha difikuldade ba estrada atu transporta materiál eleisaun prezidensiál.

“Sentru votasaun 22 ne´e pertense iha Postu Administrativu, Maucatar, Fatumea, Fohorem no Zumalai no sentru votasaun nebé la asesu estrada hamutuk 12 ne´ebé lokaliza iha Postu Administrativu Zumalai, Fatumea, Fatululik no Suai-Vila“, dehan Francisco Gusmão ba Tatoli, iha nia kna’ar fatin,Kanpung-Baru, ohin.

Gusmão afirma katak sentru votasaun ne’ebé mak la asesu enérjia elétrika, STAE prepara petromas ba Brigade sira hodi utiliza bainhira prosesu kontajen to’o kalan iha sentru votasaun.

Nune’e mós, sentru votasaun ne’ebé mak la asesu estrada, STAE sei selu sidadaun sira ne’ebé transporta materiál eleisaun ho valór $ 70.

“Kona-ba sentru votasuan ne’ebé  mak la asesu estrada, STAE iha ona kustu hodi selu ba sidadaun  ne’ebé lori materiál to’o sentru votasaun ho kustu $ 70 kada sentru votasaun”, dehan.

Enkuantu, sentru votasaun iha Munisípiu Covalima hamutuk 80, estasaun votu 92 no eleitór sira ho totál 47,807.

Rekorda katak Supremu Tribunál ba Justisa (STJ) liuhosi Tribunál Rekursu (TR), kuarta ne’e, realiza ona serímonia dada númeru sorteiu ba kandidatu Prezidente Repúblika 2022-2027 nain-16 ne’ebé admitidu iha prosesu verifikasaun atu kompete iha Eleisaun Prezidensiál ne’ebé realiza iha loron 19 marsu tinan ne’e.

Kandidatura Prezidente Repúblika na’in-16 ne’ebé admitidu mak hanesan kandidatu hosi partidu CNRT, José Manuel Ramos Horta, Partidu KHUNTO, Armanda Berta dos Santos, Partidu FRETILIN, Francisco Guterres Lú Olo, Partidu Demokrátiku (PD), Mariano ‘Aasanami’ Sabino Lopes, Partidu Demokrátiku da Repúblika de Timor (PDRT), Anacleto Bento Ferreira.

Kandidatu independente kompostu hosi Felisberto Araújo Duarte, Maria Helena Lopes de Jesus ‘Milena’ Pires, Maria Ángela Freitas da Silva, Isabel da Costa Ferreira, Hermes da Rosa Correia Barros, Tito da Costa Cristovão ‘Lere Anan Timur’, Rogério Tiago de Fátima Lobato, Virgílio da Silva Guterres ‘Lamukan’, Constâncio da Conceição Pinto, Antero Benedito da Silva no Martinho Germano da Silva Gusmão.

Jornalista: Celestina Teles

Editór: Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here