DILI, 15 fevereiru 2022 (TATOLI)—Diretór Estabelesimentu Prizaun Becora, João Domingos, informa iha Prizaun Becora rejistu katak grafika ba krime kada tinan ne’e kazu omisidíu hamutuk 40 no tuir mai mak kazu violasaun seksuál 39.
“Gráfika ba krime iha tinan-tinan aas liu ne’ebé ami rejista mak omisidíu depois mak violasaun seksuál, ne’e iha Munisípiu Dili tanba abitante sira ne’ebé mak halo ne’e hosi munisípiu sira mak mai,” João Domingos hateten ba Agência TATOLI, iha nia knaar fatin Prizaun Becora, Dili, segunda ne’e.
Totál kondenadu iha fulan-janeiru to’o dezembru 2021 hamutuk na’in-5.316 ne’ebé kompostu hosi prizioneiru kondenadu iha 4.480 no prizioneiru preventiva 1.261.
Hosi na’in-5.316 ne’e, kondenadu foun ne’ebé rejistu hahú iha janeiru to’o dezembru 2021 iha Prizaun Becora hamutuk na’in-133, no kondenadu ne’ebé sai ka liberdade hamutuk na’in-166 no kondenadu transfere tama iha ema ida no mós mate iha ema na’in-haat (4).
Kona-ba tipu krime iha janeiru to’o dezembru 2021 hamutuk na’in-133 ne’ebé kompostu hosi koasaun seksuál hamutuk na’in-haat (4), abuzu seksuál ba menor na’in-23, abuzu seksuál ba adolensente na’in-tolu (3), violasaun seksuál na’in-11, Fraude Fiskál na’in-tolu (3), Brankeamentu Kapitál na’in-tolu (3), inséndiu, danu no violasaun na’in-lima (5), falsifikasaun ba domumentu ka Adminitrasaun burla informátika na’in-lima (5).
Estatístika kriminál hosi Munisípiu 12 inklui Rejiaun Administrativa Espesiál Oé-Cusse Ambeno (RAEOA) inklui estranjeiru hahú hosi janeiru to’o dezembru 2021, munisípiu Dili iha 67, Baucau 13, Viqueque ualu (8), Lautém ualu (8), Liquiça hitu (7), RAEOA ualu (8), Aileu hitu (7), Manatuto haat (4), Manufahi haat (4), estranjeiru tolu (3), Covalima rua (2), Ermera rua (2), Ainaro ida (1) no Munisípiu Bobonaro 0.
Jornalista : Osória Marques
Editór : Cancio Ximenes
