Inan, aman hein oan sira iha Sentru Saude Vera-Cruz tanba hetan moras dengue, Kuarta 9/2/2022. Imajen Tatoli/Antonio Dasiparu

DIL, 14 fevereiru 2022 (TATOLI)— Tuir dadus estatístika hosi Ministériu Saúde (MS) liuhosi Diresaun Nasionál Saúde Públika liuliu Departamentu Vijilánsia Epidemolojia, hahú fulan-janeiru to’o domingu horisehik (13/02),   pasiente dengue sa’e ba 2.004 no  konsege hamate labarik na’in-30.

“Situasaun kazu dengue iha Timor-Leste hosi janeiru mai too horiseik hamutuk kazu 2.004 no kumulativu óbitu na’in 30,” refere nota ne’eb’e Agência TATOLI asesu ohin.

Maioria kazu ne’e deteta husi Munisípiu Dili ho totál 1.290, Baucau 82, Manatuto 132, Covalima 68, Ermera ho kazu 85, Manufahi 83, Viqueque 44, Ainaro 27, Liquiça 51, Aileu 46 no Bobonaro 30 Lautem 63 no RAEOA tolu.

Munisípiu Dili nafatin rejista kazu ne’ebe a’as iha primeira semana  to’o sesta semana fulan fevereiru 2022, ho totál kazu 1.290 kazu. Nune’e  haree ba kada loron kazu aumenta bebeik husi Munisípiu Dili.

To’o ohin loron  hahú semana dahuluk fulan janeiru tinan 2022, kazu dengue  hosi  postu administrativu Dom Alexo iha  684, Cristo-Rei 277, Vera-Cruz 142, no Nain Feto 151.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 273, Klínika Fatumeta 180, sentru saúde Comoro 375, sentru saúde Vera-Cruz 55, sentru saúde Formoza 192, sentru saúde Becora 158 klinika madre eliza ida, sentru saúde Atauro 11, sentru saúde Metinaro 2, klínika Bairru-Pité 21, no klínika Motael na’in-rua.

Apela ba populasaun

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Aimoruk fomigasaun iha portu Dili

Entertantu, Diretór Ezekutivu Servisu Autonómu Medikamentu no Ekipamentu Saúde (SAMES), Santana Martins informa, produtu fomigasaun ne’ebé kompaña Austrália halo akizasaun to’o ona Timor Leste.

Diretór Ezekutivu Servisu Autonomu Medikamentu no Ekipamentu Saúde (SAMES), Santana Martins. Imajen Tatoli/Francisco Sony

“Ita-nia fumigasaun ne’e  foin to’o iha portu Dili iha loron 11 fevereiru, nune’e ita trata hela oinsá atu lori sai husi Portu tanba informasaun ne’e hosi parte DFAT Austrália liberta husi Portu  mak sira entrega ba ita hodi halo distribuisaun,” Diretór SAMES hateten ba Agência TATOLI iha nia kna’ar fatin, Kampu-Alór.

Governu sosa kuantidade fumigasaun litru 1.000 no sei mai tan iha fulan-marsu ho litru 1.600 tan tanba ai-moruk abate sei sufisiente hela liuhosi apoia parseiru sira.

“Ita estoke laiha mak malathion de’it, maibé abate sufisiente ba distibuisaun, nune’e iha fulan marsu mak transporta fali aimoruk abate,” nia akresenta.

Ministériu Saúde liuhosi SAMES halo kontratatu ho kompañia Australianu atu sosa aimoruk fumigasaun no abate ho orsamentu $51.000.

Notísia relevante: Surtu dengue: óbitu na’in-30 no pasiente sa’e ba 1.937

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here