Bee-moos. Imajen/Espesiál

COVALIMA, 12 fevereiru 2022 (TATOLI)–-Komunidade iha suku Zulo, postu administrativu Zumalai, munisípiu Covalima, to’o agora seidauk asesu bee-moos, nune’e tenke la’o ho distánsia dook hodi bele kuru bee.

“Ami preokupa tanba ami-nia komunidade iha ne’e la asesu bee-moos, nune’e sira tenke la’o ho distánsia kilómetru ida hodi  kuru bee-matan ne’ebé beala sira husik, hodi uza ba nesesidade loron-loron,” Xefe suku Zulo, João Lopes de Carvalho, informa ba Agência TATOLI, via telefónika, sábadu ne’e.

Notísia relevante: BTL,E.P kontinua halo melloramentu sistema bee-moos no saneamentu

Antes ne’e, Governu loke ona konkursu ne’ebé ikus mai empreza Delta Nova Junior, LDA mak sai manan-na’in hodi instala ona bee-moos ba komunidade iha suku ne’e, maibé entre fulan-juñu to’o jullu 2021 bee maran.

Razaun empreza instala bee-moos no komunidade asesu iha tempu badak de’it bee maran tanba instalasaun balun iha área Fatuleto knua ladún metin.

“Kona-ba problema ne’e, ha’u nu’udar líder komunitária hato’o ba Governu maibé to’o ohin loron seidauk iha resposta ruma, maibé husu nafatin ministériu kompetente atu rezolve problema ne’ebé mak komunidade enfrenta,” nia akresenta.

Suku Zulo kompostu hosi aldeia Leogol, Zulo tas, Lale no Obukmil, ho uma-kain hamutuk 246.

Bazeia ba dadus 2015, hatudu katak komunidade ne’ebé asesu ona bee-moos iha área urbana atinje 75% no rurál 68%.

Atu hadi’a sistema bee-moos, daudaun Bee Timor-Leste, Empreza Públika (BTL, E.P) kolabora ho parseiru sira hanesan UNICEF no Water aid, hodi ajuda realiza programa sira liuhosi Planu Nasionál Dezenvolvimentu Suku (PNDS) no sosiedade sivil.

Munisípiu hanesan Aileu, Liquiçá, Ermera, Ainaro, Covalima no Bobonaro, daudaun iha faze halo estudu planu mestre, ne’ebé bainhira faze ne’e ramata, empreza sei entrega reazultadu ba BTL, E.P hodi dezenvolve dezeñu detalladu no halo estudu viabilidade hadi’a sistema bee-moos.

Jornalista : Celestina Teles

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here