iklan

NASIONÁL, KAPITÁL

Prosesu instalasaun kaixote lixu 4.000 tama ona auditoriu Tribunál Kontas

Prosesu instalasaun kaixote lixu 4.000 tama ona auditoriu Tribunál Kontas

Trabailodores sira kontinua raut hela lixu neebe komunidade sira soe iha estrada ibun area komoro, tersa 18/12022.Imajen Tatoli/Antonio dasiparu

DILI, 11 fevereiru 2022 (TATOLI)-Sekretariadu prezidente Autoridade MunisípiuDili, AntónioMoniz Clau, informa prosesu ba instalasaun kaixote lixu 4000 iha sidade Dili daudaun ne’e tama ona auditoriu Tribunál Kontas hodi verifika dokumentu hosi empreza sira.

Notísia Relevante: AMD sei koloka kaixote lixu 4000 iha sidade Dili

“Ha’u hanoin kona-ba kolokasaun fatin lixu iha sidade Díli, liu-liu ba kaixote lixu 4.000 ne’ebé ita sei koloka iha munisípiu Díli ne’e. ninia prosesu ne’e agora daudaun iha ona Tribunál Kontas. Hosi ne’e ita-nia kompañia timor-oan ne’ebé konsorsiu ho kompañia internasionál sira, ita hein verifikasaun dokumentu hosi Tribunál Kontas. Bainhira Tribunál Kontas fó ona desizaun, ita fó sai no bolu ona sira hahú sira-nia servisu,” António Moniz Clau hateten ba Agência Tatoli, iha nia knar fatin, Matadouro, Dili, sesta ne’e.

Iha prosesu kolokasaun kaixote lixu 4.000 daudaun ne’e munisípiu Dili identifika ona fatin hamutuk zona 40 iha sidade Dili hodi instala lixu rihun 40 ne’e.

“Ne’ebé, ita halo ona sosializasaun ba iha 40 zona ne’ebé ita sei koloka kaixote lixu 4.000 ne’e. Hosi zona 40 zona ne’e sei fahe ba parte Leste 18 no parte Oeste hamutuk 22,” nia informa.

Kona-ba planu bainhira mak instala kaixote lixu 4.000 ne’e, nia hatán, daudaun ne’e munisípiu Dili hein hela Tribunál Kontas halo justifikasaun ba dokumentu hosi empreza sira katak la iha irregularidade ruma ne’ebé sira komete, entaun munisípiu Dili bele bolu ona empreza sira hodi hahú ona servisu.

“Se desizaun ne’e tun lalais liu iha fevereiru nia laran, ita bele hahú iha marsu,” nia afirma.

Iha sorin seluk, Sekretariadu Prezidente Autoridade Munisípiu Dili deside lakohi fó komentáriu kona-ba empreza hira mak kompete iha konkursu ba instalasaun kaixote lixu 4.000.

“Kona-ba kompañia hira mak kompete iha konkursu ba instalasaun lixu ne’e ita seida’uk bele fó sai ida-ne’e,” nia dehan.

Notísia Relevante: PN aprova orsamentu adisionál millaun $2,3 ba Autoridade Munisipál Dili

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!