Diretór Obra Públika munisípiu Bobonaro, António Mahana Soares. Imajen Tatoli/Sérgio da Cruz.

BOBONAR0, 10 fevereiru 2022 (TATOLI) – Ministériu Obra Públika (MOP) iha tinan ne’e sei implementa projetu reabilitasaun estrada rurál pakote 13 iha postu administrativu neen iha munisípiu Bobonaro.

Diretór Obra Públika munisípiu Bobonaro, António Mahana Soares, esplika, hosi totál  pakote 13 ne’e, iha projetu manutensaun periódika pakote tolu ministériu mak halo konkursu no daudaun ne’e implementa ona, maibé pakote 10 mak seidauk implementa tanba Komisaun Nasionál Aprovizionamentu (CAN, sigla portugés) seidauk konklui prosesu konkursu.

Projetu hirak-ne’e tuir loloos implementa iha tinan kotuk, maibé tamba governu foin anúnsia prosesu no rezultadu konkursu ne’e iha fulan-dezembru 2021, nune’e iha tinan ne’e mak foin hahú implementa.

“Projetu ne’e pakote tolu implementa ona, iha pakote 10 mak seidauk, maibé hosi ne’e iha pakote ne’e ualu mak manán-na’in iha tiha ona, kompañia sira hein de’it asina kontratu atu hahú tama ba implementasaun, maibé iha pakote rua mak sei halo re-konkursu, to’o agora seidauk fó-sai, ita fiar katak CNA halo ninia prosesu ne’e lalais,” nia informa ba jornalista sira, iha kna’ar-fatin, Holsa, Maliana, kinta ne’e.

Pakote tolu ne’ebé implementa ona, pakote ida hahú hosi ponte área SMP 2 ba to’o iha aldeia Rokon, suku Odomau, postu administrativu Maliana, pakote ida hosi SMP 2 ba to’o aldeia Atus, suku Gildapil, postu administrativu Lolotoe ho distánsia kilómetru 20-resin, no pakote ida iha postu administrativu Balibo, hahu iha suku Balibo vila ba suku Leohitu, area ponte besi nia ba suku Cowa, postu administrativu Balibo.

Enkuantu projetu ne’ebé seidauk implementa iha postu administrativu Cailaco iha pakote tolu, pakote ida hahú hosi  área SMP Beadila, suku Goulolo ba to’o suku Genulai ho kilómetru ida ho balun.

Kontinuasaun hosi suku Genulai ba to’o suku Goulolo ho totál kilómetru ida ho balun no ida hosi área Mautalo ba to’o aldeia Poerema, suku Meligo ho distánsia kilómetru rua.

Nune’e mós iha postu administrativu Bobonaro pakote tolu ho ditánsia kilómetru neen, ida hahú hosi Bobonaro Vila ba to’o suku Ai-asa ho kilometru rua. Kontinasaun hosi kampu Bobonaro vila ba to’o sede suku Sibuni ho total kilómetru rua, no pakote ida hosi kruzamentu Marobo ba suku Ilat-laun, area Borluli ho kilómetru rua.

Hosi parte postu administrativu Lolotoe pakote ida, hahú hosi Alto Lebos ba suku Gildapil ho kilómetru tolu. Enkuantu postu administrativu Atabae hahú hosi Rairobo ba to’o área Pasmaten ho distánsia kilómetru rua.

Totál orsamentu ne’e governu prevee ba reabilitasaun ba estrada rurál ne’e ho montante $2,86.281,70, no orsamentu ne’e mai hosi tinan fiskál 2021 nian liuhosi Fundu Infraestrutura (FI).

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here