Ministru Asuntu Parlamentár no Komunikasaun Sosiál, Francisco Jerónimo. Imajen TATOLI/Francisco Sony

DILI, 08 fevereiru 2022 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Martins da Costa Perreira Jerónimo, hateten Timor-Leste sei simu vizita trofeu Kopa Mundiál iha fulan-juñu tinan ne’e.

“Ha’u informa ba Primeiru-Ministru katak notísia di’ak ba Timor-Leste, iha informasaun hosi Prezidente FIFA, katak iha loron 10 juñu 2022, dader tuku 10:00 aviaun sei semo hosi Qatar mai Timór lori trofeu ne’e mai, to’o Timór sei halo tour haleu Dili no lori fali bá Austrália, hafoin fila fali,” Ministru informa, hafoin reuniaun ho Xefe Governu, iha Residénsia Farol, tersa ne’e.

Tuir atuál Prezidente Federasaun Futeból Timor-Leste (FFTL) ne’e, bainhira trofeu ne’e to’o iha Timór, komunidade ne’ebé mak gosta bola bele asiste diretamente durante oras haat to’o ualu, tanba hafoin ne’e sei lori haleu mundu.

“Preparasaun agora hahú hela hosi Federasaun Futeból Timor-Leste, ne’ebé sei koordena ho Governu liuhosi Sekretaria Estadu Juventude no Desportu hodi simu trofeu ne’e. Normalmente iha nasaun sira seluk ne’e empreza Cocacola mak hala’o preparasaun, maibé tanba empreza ne’e iha Timór laiha, entaun FIFA fó fiar ba federasaun atu organiza hamutuk ho Governu,” nia informa.

Antes ne’e, kopa mundiál tinan 2018 realiza iha França no nasaun ne’e mak sai kampiaun ba jogu, enkuantu tinan 2022 ne’e sei realiza iha Qatar.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here