Primeiru-Ministru, Taur Matan Ruak. Imajen TATOLI/Francisco Sony

DILI, 08 fevereiru 2022 (TATOLI)—Primeiru-Ministru (PM), Taur Matan Ruak, adia vizita traballu bá Austrália tanba infetadu ka pozitivu COVID-19.

“Primeiru-Ministru tersa ne’e hato’o pedidu adia vizita ofisiál bá Austrália, ne’ebé planeia ona ba kuarta semana ne’e, ho razaun saúde, tanba rezultadu teste SWAB iha loron 07 no 08 fevereiru 2022, fó sai iha tersa lorokraik, konfirma Xefe Governu ho nia espoza, Isabel da Costa Ferreira, pozitivu COVID-19,” relata nota ne’ebé Agência TATOLI asesu hosi Gabinete Primeiru-Ministru, tersa ne’e.

Notísia relevante: PM Taur sei vizita Austrália semana oin

Nota ne’e haktuir, maski pozitivu COVID-19, maibé Xefe Ezekutivu no nia espoza, ho kondisaun saúde di’ak, ne’ebé tuir rekomendasaun médiku presiza deskansa iha uma no tuir protokolu saúde hodi hein teste tuir mai.

Kona-ba pedidu adia vizita ne’e, Xefe Governu komunika ona ho Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, atu komunika formalmente ba parte Governu Austrália no sei ajenda fali ba tempu oportunu.

Tuir ajenda, Xefe Ezekutivu sei halo viajen ba Austrália iha kuarta (09/02), ho aviaun QANTAS Airline, no sei fila hikas iha loron 16 fevereiru 2022.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here