Ministru Agrikultura no Peska (MAP), Pedro dos Reis. Imajen TATOLI/Francisco Sony

DILI, 07 fevereiru 2022 (TATOLI)–Ministériu Agrikultura no Peska (MAP) ho kolaborasaun Market Development Facility (MDF) hosi Austrália, reativa fali kampaña nasionál sensibilizasaun públika kona-ba kombate propagasaun moras African Swine Fever (ASF) ne’ebé fó ameasa ba fahi sira.

Ministériu Agrikultura no Peska, Pedro dos Reis, hateten, inisiativa parte rua reativa fali kampaña nasionál ne’e tanba iha dezembru 2021, MAP deteta moras ne’e iha munisípiu Dili, Baucau, Bobonaro no Lautém.

“Insidente hirak ne’e iha potensialidade atu transforma ba surtu luan liu, ho ida-ne’e ita tenke reativa kampãna African Swine Fever, tanba iha tinan 2019 moras ne’e mosu no hamate fahi iha territóriu laran tomak hamutuk 158.000. Liu tiha ida-ne’e, ita livre oituan, maibé agora mosu fali ona,” Ministru relata liuhosi diskursu iha salaun MAP, Comoro, segunda ne’e.

Notísia relevante: Virus ASF Hahú Menus Hafoin Hamate Fahi Rihun 16

Nune’e, atividade ne’e tenke la’o tanba fahi importante tebes ba Timor-Leste, tanba ne’e entidade hotu tenke foti medida hotu hodi hapara moras ne’e labele da’et liután no tenke kuidadu fahi sira ne’ebé hakiak.

Iha fatin hanesan, Diretora Nasionál Veterinária, Joana Bendita da Costa, hateten, moras ASF da’et de’it ba fahi, la’os ba ema no animál sira seluk.

“Moras ASF ne’e bele infeta ba tipu fahi hotu, inklui fahi sira iha Timor-Leste, infelizmente African Swine Fever espalla ho lais no bele hamate fahi sira lais tebes. Laiha vasina, aimoruk ka tratamentu ba moras ne’e, ita só bele halo de’it prevensaun liuhosi mantein ka sulan fahi iha luhan, labele fó hahán restu dapur, maibé uza hahán hirak ne’ebé halo rasik, fó ai-han nutritivu ka uza hahán komersiál,” nia dehan.

Nune’e atu prevene moras ASF, tenke fase fahi luhan pelumenus loron ida dala-rua, uza bee ekipamentu moos no bandu importasaun fahi no produtu ba fahi hosi nasaun sira ne’ebé afetadu ASF.

Ekipa MAP atualmente dezloka ona iha terrenu atu halo investigasaun ba propagasaun moras ne’e.

“Iha tempu badak MAP sei kolabora ho MDF, karik disponível sei hahú kampaña African Swine Fever iha fevereiru 2022,” nia tenik.

Kampaña konjunta ne’ebé hahú iha tinan 2020 no kontinua iha 2021 atinje ona besik ema na’in 627.647, hodi hamosu rezultadu peskiza ne’ebé hatudu katak 90% hosi na’in ba fahi sira kumpre matadalan no asegura ona fahi hosi moras ASF.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here