Ilustrasaun Dengue. Imajen/Espesiál

VIQUEQUE, 07 fevereiru 2022 (TATOLI)–Xefe Sentru Saúde postu Viqueque villa, Celestina da Costa Alves, informa, kazu dengue iha rejiaun ne’e aumenta ba bebeik no fatin internamentu limitadu ba pasiente.

“Hahú loron 01 to’o 07 fevereiru ne’e ita rejista kazu dengue 17 maka baixa iha intenamentu Viqueque, maibé fatin limitudu tebes, liuliu kama. Balun baixa no balun di’ak oituan ita husu atu fila ba uma, maibé iha balun kondisaun ladi’ak sira fila mai baixa,”  Xefe Sentru Saúde postu Viqueque Villa hateten ba Agência TATOLI, iha ospitál internamentu Viqueque, segunda ne’e.

Notísia relevante: Dengue hamate labarik na’in-27 iha Timor-Leste

Kazu dengue hahú iha fulan-janeiru iha na’in-21, kompostu hosi kazu tuan 11 no kazu foun 10.

“Intervensaun ba kazu dengue ne’ebé sa’e ne’e, ami halo ona fumigasaun ba fatin afetadu sira hanesan Beloi, Boro Matan, Lamak Laran no  Olobai,” nia akresenta.

Pasiente dengue ne’ebé doutór sira haree ho kondisaun grave, sira tenki baixa no kazu ne’ebé grave liu no labele atendementu iha internamentu Viqueque, tenki  transfere  ba ospitál referál Baucau.

“Fatin la sufisiente ba pasiente sira, maibé ita buka meiu hodi halo atendementu ba ita-nia pasiente sira, iha internamentu ne’e kama hamutuk 24, maibé la’ós ba kazu dengue maibé ba moras seluk. Nune’e ami uza mós fatin izolamentu COVID-19 iha Polo Universidade Nasionál Timor-Lorosa’e (UNTL) Viqueque, uza hodi baixa pasiente dengue,” nia dehan.

Nune’e, nia husu ba komunidade atu tau-atensaun ba ambiente tanba susuk moris iha ambiente ne’ebé la saudável, bee mamuk, no vazu ai-funan sira, inklui roupa iha uma-laran, tanba ne’e presiza hamoos didi’ak atu susuk labele moris iha fatin hirak ne’e.

“Ita mós  presiza fó ai-han ne’ebé  ho nutrisaun di’ak ba oan sira konsumu, hodi isin bele forte nafatin,” nia tenik.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here