Uma ne’ebé komunidade konstrui iha mota ninin Becora besik ponte Maufelu. Imajen Tatoli/Nelia Fernandes.

DILI, 07 fevereiru 2022 (TATOLI)—Adjuntu Prezidente Autoridade Munisípiu Dili, António Moniz Calau, segunda (07/02) ne’e orienta ona ekipa tékniku tun ba terrenu hodi fó xamada atensaun ba ema-ne’ebé konstrui (halo) uma besik mota Becora.

Uma ne’ebé komunidade konstrui iha mota ninin Becora besik ponte Maufelu. Imajen Tatoli/Nelia Fernandes.

“Ohin, ha’u orienta ona ita-nia ekipa jestaun merkadu tun ba iha terrenu hodi fó xamada atensaun ba ita-nia komunidade sira-ne’ebé halo uma besik mota Becora, atu labele halo uma iha mota ninin. Tanba, tuir dekretu Lei númeru 33/2008 bandu totál komunidade atu labele hela iha fatin risku hanesan mota ninin, foho-lolon no tasi ibun, tanba bele tau risku ba sira-nia an rasik,” António Moniz Calau hateten ba Agência Tatoli, iha nia knaar-fatin, segunda ne’e.

Komunidade ne’ebé konstrui uma no hela iha mota ninin ne’e, AMD haruka ona pessoál jestaun merkadu tun ba fó xamada atensaun, liu-liu ba sira ne’ebé foin halo konstrusaun uma iha fatin risku sira-ne’e atu sobu.

Tanba, iha fulan dezembru (2021) nia laran, AMD haruka ona pesoál jestaun merkadu sira ba halo ona xamada atensaun verbál no agora prepara hela xamada atensaun eskrita ba sira atu sira sobu rasik, se AMD nia karta durante xamada atensaun eskrita dala tolu sira la halo kauza mak AMD sei foti medida.

Kona-ba konstrusaun uma iha Kuluhun, nia esplika, konstrusaun ne’e tama ona iha AMD nia lista atu halo atuasaun, tanba verbálmente jestaun merkadu fó hatene ona ba sira.

“Ita-nia ekipa tun fó hatene ona ba sira, nune’e sira promete mai ita katak sira atu sobu rasik. Agora ita halo hela karta xamada hodi fó hanoin ba sira katak se imi la sobu tuir saida mak ita halo ona konsensu, munisípiu Dili sei foti medida,” nia dehan.

Xefe Departamentu Jestaun no Merkadu Munisípiu Dili, Arthur Henriques, hateten nia parte ohin ba hasoru no ko’alia ona ho ema-ne’ebé halo uma besik mota Becora, atu labele halo uma iha mota ninin.

“Uma-na’in ne’e Bangladeza ida, ne’ebé ohin, ami ba ko’alia ona ho nia atu labele halo uma iha ne’e, tanba fatin ne’e Governu atu loke tan estrada. Maibé nia hateten fatin ne’e rai na’in mak fó ba nia, tanba ne’e, ami sei koordena ho Polísia Eskuarda Becora no administradór postu administrativu Cristu Rei atu tun ba terrenu hodi rezolve,” nia informa.

Tuir nia, uma ne’ebé halo besik mota merkadu Becora, tenke sobu tanba fatin ne’e iha ona planu atu loke estrada iha mota ibun, ne’ebé hakarak ka lakohi tenke sobu.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here