MAP apoia fasilidade ba grupu hamutuk 37iha RAEOA hodi dezenvolve projetu Hasa'e Produtividade Agrikultura Sustentável. Imajen mídia ZEESM.

DILI, 04 fevereiru 2022 (TATOLI) – Ministériu Agrikultura no Peska (MAP) apoia fasilidade teknolojia post-kolleta ba grupu alvu basia hidrografia Tono hamutuk 37 hodi dezenvolve projetu Hasa’e Produtividade Agrikultura Sustentável (HAPAS) iha Rejiaun Administrativa Espesiál Oé-Cusse Ambeno (RAEOA).

Reprezentante Prezidente Autoridade RAEOA atuál Sekretáriu Rejionál ba Asuntu Agrikultura, José Eta, informa, projetu HAPAS hahú estabelese iha 2017, ho implementasaun progresu servisu fazeadamente, hahú ho formasaun no identifikasaun, kapasitasaun ba grupu sira hamutuk-37, mai hosi suku neen (6) iha sub-rejiaun tolu.

“Mákina ne’e bele dulas batar, hare no kafé tanba ne’e husu ba grupu sira-ne’ebé simu ona fasilidade hirak-ne’e, atu koopera ho ekipa tékniku estensionista sira iha kada suku,” nia informa ba Agência TATOLI liuhosi telefónika, sesta ne’e.

Projetu ne’e hala’o iha 2022 atu hadi’a produtividade hosi agrikultór ki’ik sira no fó-tulun atu fa’an produtu sira-ne’e, liuhosi planu dezenvolvimentu nian ida-ne’ebé atu ezekuta iha zona mota Raumoko nian iha Lautem, zona mota Belulik nian entre Ainaro no Covalima.

Nune’e mós zona mota Loes nian entre Liquiçá, Ermera no Bobonaro, no basia hidrográfika Tono nian iha RAEOA.

Projetu ne’e hetan finansiamentu hosi programa seguransa ai-han no agrikultura globál, (GAFSP, sigla inglés), ho montante millaun $21, ne’ebé hala’o liuhosi parseria Banku Mundiál, Organizasaun Sosiedade Sivíl sira no Organizasaun Nasaun Unida nian ba Ai-han no Agrikultura (FAO, sigla inglés).

Iha parte seluk, iha tinan 2022 ne’e, Banku Mundiál apoia fundu hamutuk $88,800 ba projetu HAPAS hodi arrola ekipamentu teknolojia post-kolleta ne’ebé distribui ba grupu benefisiáriu ne’e hanesan mákina multi-funsaun hodi dulas batar no haree hamutuk unidade 111, dasi hamutuk unidade 111, bidón plástiku litru 60 hamutuk unidade 1.110 no apoia ne’e bazea ba proposta ne’ebé grupu sira submete.

Grupu sira-ne’e mai hosi sub-rejiaun Oésilo iha suku Usitasa’e hamutuk grupu hitu (7), suku Bobometo hamutuk grupu grupu 14 no suku Usitaqueno, sub-rejiaun Pante Makasar iha suku Naimeco hamutuk grupu hitu (7), sub-rejiaun Pásabe iha suku Malelat hamutuk grupu tolu (3), kada grupu envolve ema na’in 30.

Projetu HAPAS ne’e, Ministru Agrikultura no Peska (MAP), Pedro dos Reis, akompaña hosi autoridade Rejiaun Administrativa Espesiál Oé-Cusse Ambeno (RAEOA), apoia fasilidade teknolojia post-kolleta ba grupu alvu basia hidrografia Tono hamutuk 37 iha loron-kuarta liubá.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here