Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (05/01). Imajen TATOLI/Francisco Sony

DILI, 02 fevereiru 2022 (TATOLI)-Governu liuhosi reuniaun Konsellu Ministru (KM), aprova ona proposta Rezolusaun ba Parlamentu Nasionál (PN) atu ratifikasaun adezaun Timor-Leste ba tratadu proibisaun arma nuklear sira. 

Proposta ne’e aprezenta hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno.

“Tratadu ne’e ho objetivu atu bandu uzu, dezenvolvimentu, produsaun, teste, armazenamentu, transferénsia no ameasa uzu arma nuklear, ho hanoin atu halakon arma nuklear sira hotu,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu, kuarta ne’e.

Notísia relevante: TL Aprova Proposta Tratadu Proibisaun Arma Nukleár

Portavóz Governu ne’e dehan, adezaun ne’e importante tanba Timor-Leste hanesan país soberanu ida, bele hato’o ninia lian kona-ba uzu no  ninia opiniaun kontra perliferasaun arma nuklear ba iha mundu.

“Entaun, ida-ne’e husu ba país sira ne’ebé mak boot iha arma nuklear atu labele espalla liután no mós labele uza armamentu nuklear sira ne’e, karik país sira ne’ebé maka boot uza arma nuklear sira ne’e fó risku ba umanidade tomak inklui Timor-Leste,” nia akresenta.

Hafoin aprova, konvensaun sira ne’e sei haruka ba Parlamentu Nasionál hodi halo deliberasaun, nu’udar rezolusaun parlamentár ida.

Jornalista : Antónia Gusmão 

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here