Médiku sira iha Sentru Saúde Vera-Cruz halo hela atendementu ba labarik sira ne’ebé hetan moras dengue, Imajen Tatoli/Antonio Dasiparu

DILI, 02 fevereiru 2022 (TATOLI)— Tuir dadus hosi Diresaun Nasionál Saúde Públika liuliu Departamentu Vizilánsia Epidemolojia iha Ministériu Saúde, tersa ne’e, relata pasiente dengue iha sa’e ba 1.316, hosi númeru ne’e labarik na’in-21 mak mate.

Situasaun kazu dengue iha Timor-Leste, ohin loron 01 fevereiru 2022, kazu dengue hamutuk 1.316 no kumulativu óbitu na’in-21,” refere nota ne’ebé Agéncia TATOLI asesu kuarta ne’e.

Notísia relevante: Laiha estoke aimoruk rega susuk, dengue hamate labarik na’in-18

Maioria kazu ne’e deteta hosi Munisípiu Dili ho totál 882, Baucau 52, Manatuto 92, Covalima 31, Ermera 77, Manufahi 57, Viqueque 19, Ainaro 15, Liquiça 29, Aileu 20, no Bobonaro 26, no RAEOA ho kazu dengue tolu.

Nune’e, kazu óbito iha fulan-janeiru 2022 iha munisípiu Dili na’in-11, Ermera na’in-haat, na’in ida hosi Ainaro, na’in ida hosi Bobonaro no na’in rua hosi Covalima, no Viqueuqe na’in ida nune’e totál Case Fatality Rate nivel nasional ho 1,6%.

To’o ohin loron semana dahaat ne’e, relata Dom Alexo iha kazu 461, Cristo-Rei 173, Vera-Cruz 111 no Nain-Feto iha kazu 117.

Entertantu, Fasilidade saúde iha munisípiu Dili hanesan Hospitál Nasionál Guido Valadares rejista ona kazu dengue hamutuk 205, klínika Fatumeta 126, sentru saúde Comoro 236, sentru saúde Vera-Cruz 50, sentru saúde formoza 144, sentru saúde Becora 89, sentru saúde Atauro 11, sentru saúde Metinaro ualu, Klínika Bairru-Pite 10 no Klínika Motael na’in-rua.

HNGV laiha espasu

Xefe Departamentu Banku Urjénsia HNGV, Vidal de Jesus Lopes, informa durante  fulan-janeiru, konsege fó tratamentu ba pasiente dengue 390, hosi númeru ne’e na’in-10 mak mate.

“Fulan janeiru nia laran pasiente dengue hamutuk 390 mak halo ona tratamentu iha sala emerjénsia no na’in 10 mak mate tanba inan aman balun lori labarik sira mai ho kondisaun ne’ebé mak grave ona,” Xefi Departamentu ne’e hateten  ba jornalista sira iha HNGV-Bidau.

Hosi númeru 390 ne’e barak mak transfere ba iha sentru internamentu Vera-Cruz ho razun tanba espasu mak limitadu, nune’e númeru pasiente ne’ebé mak iha HNGV transfere na’in-188 hodi halo tratamentu iha ne’ebá.

“Espasu nafatin problema tanba koridor nafatin tau kama, maibé ikus ikus ne’e kazu dengue menus ona, maibé    HNGV nafatin ativa triajen. Tanba ita haree kazu COVID-19 aumenta fila-fali ita mós mantein nafatin triajen hodi deteta pasiente  sira ne’ebé mak mai halo tratamentu iha  ne’e,”nia esplika

Aimoruk atraza

Diretór Ezekutivu Servisu Autonomu Medikamentu no Ekipamentu Saúde (SAMES), Santana Martins, informa aimoruk abate no fumigasaun sei to’o iha Timor-Leste tarde tanba ro atraka atraza iha Singapura.

“Tuir orariu aimoruk abate no fumigasaun to’o iha ita-nia rain ne’e iha loron 31 janeiru, maibé kestaun  transporte martima ka  ró atraka atrazu iha Singapura entaun tuir dokumentu  ne’ebé mak ami simu ne’e  sei to’o iha ne’e 12 no 14 fevereiru 2022,” Diretór Ezekutivu SAMES ne’e akresenta.

SAMES halo esforsu hela ba malation ne’ebé mak apoia hosi Organizasaun Mundiál Saúde  no prosesa  hela apoia hosi Austrália hamutuk litru 1000 ne’ebé daudaun transporta hosi Surabaya atu mai iha Timor iha tempu badak.

“Agora ba dengue teste kits ne’ebé ita simu ona dokumentu no trata hela atu selu taxa  espera  aban bele  hasai ona,  maibé ita daudaun ne’e esforsu hela para iha fulan ne’e nia laran ita-nia sasan bele too hotu iha ita-nia rain,” Nia esplika.

MS apela ba populasaun

Ministériu Saude apela ba populasaun iha Dili laran no mós iha munisipiu sira seluk, atu aprezenta-an iha fasilidade públiku saúde (Sentru Saúde ka ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu hosi profisionál saúde sira.

Apela mós ba autoridade munisipál no autoridade lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau be semana ida dala ida.

Hamoos sasan ka limpeza hanesan roda aat, bazu aifunan atu susuk labele tau tolun, haloot ropa ho di’ak iha uma-laran, uza ropa ne’ebé liman naruk karik toba iha tempu loron, uza aimoruk hanesan repelente ka autan, uza muskiteru karik toba iha tempu loron no so’e lixu iha nia fatin.

Notísia relevante: MS kontinua esforsu halo asaun prevensaun kombate dengue iha TL

Jornalista: Felicidade Ximenes

Editór: Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here