Kongregasaun Salesiana no família salesiana iha Timor-Leste selebra festa São João Bosco ho selebrasaun misa. Imajen Tatoli/Domingos Piedade Freitas.

DILI, 31 janeiru 2021 (TATOLI)—Santu Padre Francisco ho Reitor Mor Salesiano Angel Fernández hato’o parabéns ba família Salesiana iha mundu tomak inklui kongregasaun Salesiana Don Bosco iha Timor-Leste. 

Vigáriu Provinsiál São Calistro Caravario iha Timor-Leste, Pe. Manuel Pinto, SDB, hateten lori provinsiál nia naran hato’o mós parabéns ba Família Salesiana hotu iha Timor-Leste hanesan antigu alunu, Asosiasaun de Maria Auxiliadora (ADMA), kooperadór salesiana no foinsa’e sira ne’ebé selebra festa São João Bosco iha 31 janeiru ne’e. 

“Agradese ba Maromak tamba ita Familia Salesiana bele halibur hamutuk hodi selebra São João Bosco nia festa no ita mós sente kontente liután, ho razaun bele selebra patronu Kongregasaun Salesiana, liu-liu São Fransisco de Sales nia mate ba dala-400,” Pe. Manuel Pinto, SDB, hateten iha ninia omilia iha igreja Maria Auxiliadora, Comoro, Dili, segunda ne’e.

Padre Manuel Pinto hatutan Reitor Mor ba Kongregasaun Salesiana, Dom Angel Fernandez, ba sarani sira hodi fó hanoin fila-fali São Francisco de Sales ninia liafuan ne’ebe dehan “Halo buat hotu-hotu ho domin, la’ós ho forsa”.

São João Bosco banati Fransisco de Sales hodi la buka mundu nia matenek maibe buka Maromak nia laran di’ak hodi buka foinsa’e sira.

Don Bosco la kuñese São Francisco de Sales maibe aprende ninia vertude liu-hosi ninia obra sira mak hatene virtude laran maus no midar nian hodi implementa iha misaun.

“Nunee, husu ita hotu bele kuñese klea’n Santo na’in-rua ne’e mak ita bele halo buat hotu-hotu ho domin, ho objetivu ida atu sai sidadaun onestu no sai kristaun ne’ebé di’ak,” nia esplika.

Padre selebrante ne’e mos apela ba Antigu Alunus sira-ne’ebe mak serbí iha nasaun ida-ne’e, atu bele serbi uluk mak Estadu, labele hanoin osan no pozisaun de’it iha serbisu fatin.

“Oras ne’e daudaun antigus alunu salesiano sira barak mak kandidata an ba Prezidente Repúblika, nune’e mak ha’u husu atu implementa polítika mak Ami Aman,” nia dehan.

Padre selebrante ne’e hatutan, Santu Padre Fransisco hato’o nia parabéns ba família Salesiana, maibé husu mós atu banati tuir Francisco de Sales hodi tulun foinsa’e ne’ebé susar no dezesperadu iha mundu oioin.

Konsilleiru Rejionál ba ASEAN Oseania, Pe. Joseph Phuoc, SDB, hateten Reitor Mor Salesiano, Angel Fernández kongratula no hato’o ninia parabéns ba Familia Salesiana sira iha mundu no iha Timor-Leste.

Nia hato’o agradese ba Konsellu Provinsiál ne’ebe mak simu nia ho laran luak iha Timor-Leste durante iha ninia vizita ne’e, tanba nia sente kontente tebes ho misaun Don Bosco nian iha Timor-Leste.

“Ha’u pela primeira-vez haree ema tuir misa barak hanesan ne’e, Ha’u-nia objetivu vizita ne’e atu halo konsultasaun ba padre provinsiál foun kongregasaun salesiana nian iha Timor-Leste,” nia dehan.

São João Bosco Kuñesidu ho naran Giovanni Melchiorre Bosco no Don Bosco, moris iha Becchi, Italia, iha 16 agostu 1815. Iha tinan 1835, Don Bosco tama semináriu no ordena sai Nai Lulik iha tinan 1841.

Iha tinan 1859, Don Bosco harii kongregasaun Salesiana atu serbí foinsa’e sira. Don Bosco mate iha loron 31 fulan-janeiru tinan 1888. Papa Pius XI kuñese di’ak Don Bosco no ninia kanonizasaun atu sai santu iha tinan 1934 sai “Aman no Mestre ba Foinsa’e Sira” no mahein ba foinsa’e sira.

Jornalista : Domingos Piedade Freitas

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here