Sekertáriu Jerál Partidu FRETILIN, Mari Alkatiri. Imajen TATOLI/Francisco Sony

DILI, 29 janeiru 2022 (TATOLI) – Sekretáriu Jerál FRETILIN nu’udar mós Prezidente Komisaun Polítika Nasionál (CPN, sigla portugés) Mari Alkatiri, asina rezolusaun ida hodi fó apoia totál ba kandidatu Francisco Guterres ‘Lú Olo” kontinua kompete iha eleisaun prezidensiál no irrevogável.

Iha loron 28 janeiru ne’e, iha sede Komité Sentrál FRETILIN (CCF, sigla portugés), Komisaun Polítika Nasionál FRETILIN delibera hodi konfirma apoia deklarasaun Sekretáriu Jerál FRETILIN, Mari Alkatiri kona-ba rekandidatura Lú Olo.

“Afirma katak apoiu totál no irrevogável (labele dada fila) no instrui ba estrutura hotu kuadru no militante FRETILIN iha rai-laran no diáspora respeita vontade kandidatu Lú Olo hodi re-kandidata hanesan kandidatu nasionál, transversál no inkluziva, nune’e fó apoiu hosi estrutura nasionál to’o baze,” refere rezolusaun CPN FRETILIN ne’ebé asina hosi Prezidente CPN no Sekretáriu Jerál FRETILIN Mari Alkatiri, ne’ebé Agéncia Tatoli asesu, sábadu ne’e.

Enkuantu, iha rezolusaun  CPN ne’e apoia rekandidatura Prezidente Francisco Guterres Lú Olo ba mandatu ida tán hanesan Prezidente Repúblika.

Rezolusaun ne’e hasai bazea Konstituisaun Repúblika Demokrátika Timor-Leste (KRDTL) iha númeru 3 artigu 75, posibilidade Prezidente Repúblika nia kumpre mandatu bele to’o daruak hanesan funsaun Xefe Estadu.

Nune’e mós estatutu partidu FRETILIN nian iha artigu 83 númeru 1, Prezidente Partidu, direitu própriu ba primeiru kandidatu ezerse funsaun Prezidente Repúblika.

Tanba ne’e, deklarasaun hosi Sekretáriu Jerál nu’udar unipesoál órgaun partidu nian, fó apoia totál re-kandidata Prezidente Lú Olo ba kargu Prezidente Repúblika periódu 2022-2027.

Lere sei hasoru Mari Alkatiri iha CCF

Jenerál  reformadu Lere Anan Timur, fó-sai katak iha tempu badak sei hasoru malu ho Sekretáriu Jerál Partidu FRETILIN, Mari Alkatiri iha Komite Sentrál FRETILIN.

“FRETILIN tenke kumpri devér  no obrigasaun frente ampla, fretilin hakuak ema hotu-hotu. Ne’e maka komisaun sei organiza, ha’u sei fila ba hasoru ita-nia maun boot fundadór Sekretáriu Jerál  FRETILIN Mari Alkatiri,” Lere hateten.

Lere agradese ba Mari Alkatiri tanba nu’udar fundadór no ema ida-ne’ebé matenek no intelektuál tanba bele kaer FRETILIN eziste to’o agora.

“Ha’u nudar membru Komite Sentrál FRETILIN ne’ebé ke eleje ha’u iha hudi tahan okos. Laiha ema ida husu, ha’u mai fali ha’u-nia uma CCF, tanba ha’u servisu, ne’e ha’u foin mai deskansa fali iha ha’u-nia uma CCF,” Lere afirma.

Jornalista         : Nelson de Sousa/Natalino Costa

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here