Lere Anan Timur hamutuk Asosiasaun Antigu Alunu Dom Bosco kuda ai-oan, iha aldeia Lesibutak, suku Manleuana, munisípiu Dili. Imajen Tatoli/Vitorino Lopes da costa.

DILI, 29 janeiru 2022 (TATOLI) – Lere Anan Timur hamutuk ho Asosiasaun Antigu Alunu (AAA) Dom Bosco, sábadu ne’e, kuda ai-oan rihun 500 hodi proteje inundasaun, iha aldeia Lesibutak, suku Manleuana, postu administrativu Dom Aleixo, munisípiu Dili.

“Ha’u ohin mai hamutuk ita-nia joven sira no salezianu Dom Bosco sira kuda ai-oan hodi proteje ba risku inundasaun no nu’udar sarani tenke kuda ai-oan ba fatin mamuk sira,” Jenerál reformadu ne’e informa ba jornalista sira, iha Manleuana, sábadu ne’e.

Lere haktuir, Prezidente Repúblika apela ona ba populasaun sira katak sidadaun ida tenke kuda ai-oan ida, maibé sidadaun ida labele kuda ai-oan ida de’it tenke kuda sanulu ba leten.

“Joven sira tenke kuda ai-oan sanulu ba leten no katuas sira ai-oan lima ba leten tanba kuda hún ida ita sei kuda repete beibeik hodi hamatak ita-nia rain,” nia apela.

Nia husu komunidade Manleuana tenke haree animal sira hodi proteje ai-oan sira ne’ebé kuda oan iha fatin risku ba inundasaun no labele tesi ai arbiru.

Prezidente Komisaun Organizadora, Armando da Costa, haktuir, inisiativa kuda ai-oan ne’e proteje inundasaun nomoos festeza selebra loron Dom Bosco ba dala-134.

“Ha’u mós hakarak husu agradese ba komunidade Manleuana ne’ebé koopera ho Asosiasaun Antigu Alunu Dom Bosco hodi realiza atividade kuda ai-oan ne’e,” nia akresenta.

Xefe aldeia Lesibutak, Alcino Guterres, fó-sai katak fatin ne’ebé kuda ai-oan ne’e komunidade uma-kain 40 sai vítima ba inudasaun loron 4 fulan abríl 2021 liubá.

“Ohin, kuda ona ai-oan iha-ne’e no komunidade Lesibutak tenke kuidada ita-nia animál hodi labele estraga ai-oan ne’ebé ita kuda ona, tenke hadomi anbiente hodi labele mosu inundasaun tán,” nia fó hanoin ba komunidade.

Ai-oan ne’ebé Asosiasaun Antigu Alunu Dom Bosco hamutuk estudante no komunidade sira kuada maka hanesan, au, ai-kakeu, ai-saria no selu tan.

Entretantu partisipa iha atividade kuda ai-oan ne’e mai hosi estudante sekundáriu Cristal, sekundáriu São Miguel, sekundáriu São Pedro no komunidade Lesibutak. 

Jornalista         : Vitorino Lopes da Costa

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here