Kondisaun estrada liga ho postu administrativu Lacluta. Imajen/Espesiál

DILI, 28 janeiru 2022 (TATOLI)—Kondisaun estrada liga ba postu Lacluta, munisípu Viqueque daudaun ne’e kotu, nune’e  komunidade lokál husu ba Governu liuhosi Ministériu Obra Públika (MOP) atu aselera hadi’a estrada ne’e tanba difikulta movimentu.

“Ha’u reprezenta komunidade postu Lacluta, husu ba MOP atu aselera hadi’a estrada liga postu Lacluta ne’ebé kotu iha dezembru 2021, tanba sai difikuldade ba komunidade no mós distribuisaun materiál konstrusaun ba  Uma Kbiit Laek (UKL) iha postu ne’e rasik,” Administradór postu Lacluta, José Andrade  dos Santos, hateten ba Agência TATOLI, via telefónika, sesta ne’e.

Tuir autoridade lokál ne’e, preokupasaun ne’e hato’o ona ba autoridade kompetente nível munisipál no sentrál maibé to’o agora seidauk iha resposta.

“Foin lalais iha loron 08 janeiru 2022, Primeiru-Ministru (PM) Taur Matan Ruak, mai halo diálogu iha Viqueque, ne’ebé ha’u hato’o ona, maibé to’o agora MOP seidauk ba haree. Komunidade sira loke dalan alternativa hosi mota maibé bainhira tempu udan, mota tun no transporte labele liu,” nia haktuir.

Empede implementasaun programa Governu

Kondisaun estrada a’at hosi suku Dilór, Laline to’o Ahic, empede implementasaun programa Governu hanesan atividade konstrusaun UKL hamutuk 12 tanba karreta labele asesu no distribuisaun produtu seguransa alimentár.

Aleinde ne’e, difikulta ba ekipa Servisu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) ne’ebé destaka ba suku haat hodi halo preparasaun ba Eleisaun Prezidensiál 2022. 

“Ha’u prefere iha tempu badak Governu normaliza ona estrada ne’e hodi fó susesu ba Eleisaun Prezidensiál iha postu Lacluta laran,” Administradór Lacluta dehan.

Nune’e mós, kondisaun estrada difikulta movimentasaun transporte no ema atu lori produtu ba merkadu iha Dili.

Tuir dadus abitante postu administrativu Lacluta hamutuk 9.575, kompostu hosi suku Ahic 2.361, Dilor 2.332, Laline 1.944 no Uma-tolu 2.938.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here