Sekretáriu Estadu Kooperativa, Elizário Ferreira. Imajen TATOLI/Francisco Sony

DILI, 25 janeiru 2022 (TATOLI)— Diretór Klínika Hospitál Nasionál Guidu Valadares (HNGV), Marcelino Correia, informa Sekretáriu Estadu Kooperativa (SECoop, sigla portugés), Elizário Ferreira,daudaun baixa iha  Intensive Care Unit (ICU)-HNGV tanba sofre moras raan-midar.

“Daudaun, Sekretáriu Estadu ne’e baixa iha ICU tanba sofre hela moras raan-midar, ne’ebé médiku-sira halo hela tratamentu atu hatun-nia diabetes aas no ha’u husu nia kondisaun komesa di’ak no nia ko’alia  ona espera katak loron tuir mai nia bele ba halo tratamentu iha sala Very Important Person (VIP) nian,” Diretór Klínika HNGV ne’e inform aba Jornalista sira iha HNGV-Bidaun, tersa ne’e.

Maski, nia dehan Sekretáriu Estadu Kooperativa ne’e baixa hela, maibé kondisaun saúde jerál di’ak tanba médiku sira fó atedimentu saúde ho intensivu tebes.

Kona-ba atu transfere ba rai li’ur, Diretór Klínika ne’e afirma, depende ba médiku sira ne’ebé fó tratamentu atu deside ba halo tratamentu iha rai liur ka check up.

“Depende ba ita nia médiku sira haree no hodi foti desizaun katak atu bá ka la’e, tanba depende mós ba rekursu hanesan medikamentu no ekipamentu diágnostika,” nia afirma.

Iha biban hanesan, Prezidente Parlamentu Nasionál, Deputadu Aniceto Longuinhos Guterres Lopes, hateten, nia parte vizita hodi haree kondisaun saúde membru Governu ida baixa iha sala ICU HNGV.

“Ami mai vizita HNGV ho objetivu haree kondisaun pasiente sira iha sala emerjénsia pediatria, maibé aproveita haree mós membru Governu ida baixa iha sala ICU HNGV, nune’e fó enkoraja atu rekupera lalais,” PPN Aniceto afirma.

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here